Rubrika ‘Me Nënë Terezën”: “Ah, këto intervistat!”.
(21.08.2009 RV)Vijojmë leximin
radiofonik të librit ‘Jeta ime’. Në emisionin e tetëmbëdhjetë të ciklit ‘Me
Nënë Terezën’, e Lumja e parë shqiptare na flet për shqetësimin e thellë që i
shkaktojnë intervistat. Na bind se e ka më të lehtë të mjekojë një të gërbulur, sesa
të japë një intervistë. Në një botë ku çdo ditë jepen e merren mijëra intervista,
shkëmbehen mijëra fjalë, do të ishte më e dobishme të mjekohej një i gërbulur, apo
të merrej a të jepej një intervistë? Por, sa e vështirë është të shkëmbehet dhënia
e një interviste me prekjen plagëve të shkaktuara nga gërbula, nga të cilat buron
gjak e qelb! Prandaj edhe kur iu desh të jepte një nga intervistat më të rëndësishme,
në tribunën e Oslos, duke marrë në dorëzim Çmimin Nobel, Nënë Tereza foli në një mënyrë
krejtësisht të padëgjuar në atë sallë, që ka parë e ka dëgjuar mendjet më të ndritura
të njerëzmit:
“Duhet të them se pranoj të shkoj në ceremoni të ndryshme
publike, vetëm sepse më krijohet mundësia t’u flas për Jezusin njerëzve, të cilët
nuk dihet në se do të kishin ndonjë rast tjetër për të dëgjuar fjalën e Zotit. Një
herë kam thënë edhe se e kam më të lehtë të mjekoj një të gërbulur, sesa të përgjigjem
në një intervistë. Në Oslo ndodhi një mrekulli e vërtetë: u lutën të gjithë,
në një vend ku s’ishte dëgjuar kurrë ndonjë lutje. Ishim mbledhur në një
sallë për dorëzimin e Çmimit e, sapo m’u dha mundësia të flas, thashë: “Me
që jemi mbledhur të gjithë për të falënderuar Zotin e Çmimit Nobel për Paqen, mendoj
se do të ishte vërtetë e bukur të luteshim për paqen”. E të gjithë së bashku
nisëm lutjen e Shën Françeskut: “Zot, më bëj lajmëtar të paqes sate”, teksti i së
cilës u qe shpërndarë të pranishmëve. Ishte diçka vërtetë tronditëse. Prekëse.
E mrekullueshme: luteshin të gjithë, ndonëse siç dihet, numri i katolikëve në Norvegji
është shumë i vogël. Më pas fola për abortin e thashë: “Po kremtojmë
vitin ndërkombëtar të Fëmijës. Sot po ju flas për fëmijën, që nuk ka lindur akoma.
Po ju flas në emër të fëmijës, që nuk e ka parë ende dritën e diellit. Të abortosh
do të thotë ta dënosh fëmijën me vdekje: të mos duash që fëmija të jetojë, do të thotë
ta vrasësh. Sot për sot, arma më e rrezikshme kundër paqes, është aborti. Shumkush
interesohet për fëmijët e Indisë e të Afrikës, ku vdesin me mijëra nga mungesa e ushqimit.
Por në vende të tjera miliona fëmijë mbyten nga vetë prindërit e tyre. E në se një
nënë mbyt fëmijën e vet, pse u dashka të çuditemi, kur njerëzit ia marrin shpirtin
njëri-tjetrit?!”. Duke kaluar nëpër Romë, gjatë udhëtimit të kthimit, Ati
i Shenjtë më tha:“Mos harro të flasësh si në Oslo, kudo që të shkosh!"