Kisha sllovene:bashkë me nazizmin e fashizmin të dënohet edhe komunizmi
(21.8.2009 RV)Me 2 prill të këtij viti parlamenti evropian propozoi që 23 gushti
të shpallet Dita Evropiane e viktimave të stalinizmit dhe të nazizmit. Me këtë rast
Komisioni i “Drejtësi dhe Paqe” i Konferencës Ipeshkvnore sllovene i bëri thirrje
opinionit publik slloven me anë të një dokumenti, që krahas diktaturës fashiste e
naziste të dënojë edhe atë komuniste. “Ne sllovenët – thuhet në dokumentin që
mban firmën e Imzot Antonio Stres, kryeipeshkëv ndihmës i Mariborit – jemi nga ata
popuj evropianë që kanë vuajtur njëlloj nga terrori dhe dhuna fashiste, naziste ashtu
si edhe nga ajo komuniste. Por ndërsa dy të parat dënohen me vendosmëri e treta ngurrohet
të dënohet pa mëdyshje.“Motivet - lexohet në tekst - janë të ndryshme. I pari është
një konstatimin i faktit se komunizmi në Slloveni ka mbetur në pushtet për shumë kohë,
duke fshehur fytyrën e vet të vërtetë. I dyti Parlamenti Evropian është i qartë kur
thotë se “asnjë organ politik apo parti politike nuk e ka të drejtën ekskluzive të
shpjegimit të historisë” e që “ këto organe e parti nuk mund të pohojnë se janë objektive”.
“Kohët fundit – vijon dokumenti – vihet re një prirje për ta rehabilituar të kaluarën
tonë komuniste dhe udhëheqësit komunistë, duke i zvogëluar krimet e kryera nga ata.
T’ia kushtosh rrugën kryesore të Ljubljanës përsëri Titos dhe të vazhdosh t’i
ruash emrat e vjetër të rrugëve dhe të shesheve që iu janë kushtuar udhëheqësve komunistë,
bie në kundërshtim me letrën dhe me frymën e Deklaratës të Parlamentit Evropian dhe
të Rezolutës 1481 të Asamblesë Parlamentare të Këshillit të Evropës të 26 janarit
2006, ku flitet për nevojën e dënimit të krimeve të regjimeve totalitare komuniste”
vazhdon deklarata e Konferencës Ipeshkvnore Sllovene.