Էջ մը հայ գրականութենէն - Վեր. Դոկտ. Վահան Թութիկեանի Նոր Գիրքը՝ «Կէս Դար Տիրոջ Այգիին
Մէջ»
Էջ մը հայ գրականութենէն - Վեր. Դոկտ. Վահան Թութիկեանի Նոր Գիրքը՝ «Կէս Դար Տիրոջ Այգիին
Մէջ»
Ընթացիկ տարին, 2009ը, Վեր. Դոկտ. Վահան Թութիկեանի հոգեւոր, ազգային, համա-եկեղեցական
եւ հասարակական ծառայութեան յիսնամեայ յոբելեանն է: Յոբելեար կէս դարու ծառայութիւնը
կը յատկանշուի հարուստ, բազմակողմանի եւ բեղուն վաստակով մը. վաստակ մը, որ թէ՛ իր
քանակով եւ թէ՛ իր որակով պատիւ եւ պարծանք կը բերէ համայն հայութեան:
Իր ծառայութեան
50ամեակին առթիւ Վեր. Թութիկեան լոյս կ՛ընծայէ իր 31րդ հատորը՝ «Half a Century of
Service/Կէս Դար Տիրոջ Այգիին Մէջ» վերտառութեամբ։ Հատորին 248 էջերու մէջ զետեղուած
են 41 նիւթեր -Անգլերէն՝ 27, Հայերէն՝ 14: Սոյն յօդուածներէն զատ, կան Հայերէն եւ Անգլերէն
լեզուով հատընտիր հատուածներ հեղինակին գիրքերու մասին լոյս տեսած գրախօսականներէն, որոնք
գաղափար մը կուտան անոր հրատարակած գործերուն մասին: Գիրքին Անգլերէն Բաժինը կը բաղկանայ
4, իսկ Հայերէն բաժինը՝ 3 ենթաբաժանումներէ: Հատորը կը պարունակէ հոգեւոր կարճ խորհրդածութիւններ
կամ պատգամներ, եւ ազգային-եկեղեցական տարեդարձներու յիշատակութիւններ, առօրեայ կեանքէ
առնուած նշմարներ եւ առակներ, ինչպէս նաեւ մեր ազգային մարդասիրական կազմակերպութիւններու,
կուսակցութիւններու եւ հայկական հարցերու մասին դիտումներ եւ դիտողութիւններ:
Այս
գործին մէջ հեղինակին մտահոգութիւնը հոգեւո՛ր է: Ան չի բաժներ ազգայինը, աշխարհայինը,
ընտանեկանն ու միջազգայինը՝ քրիստոնէական հաւատքէն, հետեւաբար՝ հոգեւորէն: Իրեն համար՝
այսպէս կոչուած աշխարհիկը գոյութիւն չունի, որովհետեւ համայն տիեզերքը Աստուծոյ կալուածն
է, որ կ՛իմաստաւորուի Քրիստոս Յիսուսով: Ահա թէ ինչո՛ւ ան չի բաւարարուիր բարոյագիտական
սահմանումներով ու դարմաններով, հապա մեր համապարփակ հարցերուն իբրեւ լուծում, կը յանձնարարէ
քրիստոնէական թանձրացեալ հաւատքը՝ Քրիստոսի մէջ ու Քրիստոսով:
Վեր. Թութիկեան
հոգեւորական մըն է, որ լման կէս դար ծառայած է Հայ Աւետարանական բեմին: Իբրեւ քարոզիչ,
ուսումնական, հեղինակ, եւ եկեղեցական վարչագէտ, վարած է բարձր պաշտօններ, ու տիրացած
արժանավայել տիտղոսներու եւ մրցանակներու: Ներկայիս ան գործադիր տնօրէնն է Հայ Աւետարանական
Համաշխարհային խորհուրդին: Գրական ասպարէզէն ներս ան տեւական ներկայութիւն մըն է իր տեսութիւններով
եւ խրախուսիչ թելադրութիւններով: Ան նաեւ մշտարթուն պահակն է Հայ Աւետարանական շարժումին,
նաեւ յուշարարը եկեղեցական կարեւոր դէպքերուն ու դէմքերուն: Այս վերջին մարզին մէջ հայ
աւետարանական ներկայ ու ապագայ պատմագիրները մեծագոյն երախտաւորեալները պիտի ըլլան գրիչի
այս անխոնջ ու ներհուն մշակին: