Kremtohet për herë të parë “Dita Botërore Humanitare”.
(19.08.2009 RV)Sot për herë të
parë u kremtua “Dita Botërore Humanitare” në nder të të gjithë veprimtarëve dhe anëtarëve
të Kombeve të Bashkuara që kanë humbur jetën në luftra apo në fatkeqësi natyrore.
Sot bie edhe përvjetori i bombardimit të Zyrës së OKB-së në Bagdad në gusht 2003,
ku humbën jetën 21 veprimtarë të OKB-së si edhe Komisari i Lartë për të Drejtat e
Njeriut dhe Përfaqësuesi i Posaçëm i Sekretarit të Përgjithshëm për Irakun Serxho
Viejra de Mejo. Po sot, cili është roli i atyre që ndihmojnë popullsitë në zonat
me rrezikshmëri të lartë? Në mikrofonin tonë flet Françesko Roka, komisar i jashtëzakonshëm
i Kryqit të Kuq italian:
Përgjigje: Është roli i përditshëm, i heshtur që luajnë
me mijëra veprimtarë në të gjithë botën, në të gjitha zonat ku ka kriza. Këtë nuk
duhet ta harrojmë kurrë, sepse prania e tyre në shumë situata ndihmon në zbutjen e
tensioneve të cilat pastaj shpeshherë na duhet t’i përballojmë, brenda, në shtëpinë
tonë. Pra të mbështesësh veprimtarët humanitarë do të thotë të ndihmosh edhe jetën
tonë të përditshme.
Pyetje: Në 2008 janë vrarë 122 veprimtarë ndërsa para dhjetë
vjetësh numri i tyre ishte vetëm 36. Këto janë të dhëna që u bënë publike nga vetë
OKB- ditët e fundit…
Përgjigje: Ne si Kryq i Kuq kemi si stemë Kryqin e Kuq
por edhe Gjysmëhënën e Kuqe, të njohura në të gjithë botën, por vitet e fundit po
vërejmë se respekti ndaj Konventave ndërkombëtare sa vjen e shteron më tepër. Stema
e Kryqit të Kuq është një simbol mbrojtjeje për ata që vuajnë, por vitet e fundit
kemi vënë re se në shumë situata konfliktesh nuk po respektohet as ky simbol mbrojtjeje
dhe kjo është ajo çka na shqetëson më tepër e më.