Çelësi i fjalëve të Kishës: “Fjala popull-grigjë e Hyjit’( emisioni V)
(15.08.2009 RV)Me emrin “popull”
është luajtur shpesh në të gjitha kohrat, por sidomos në diktaturë, kur “në emër të
popullit” vriteshin e priteshin edhe meshtarë e murgesha. Edhe sot, “ në emër të popullit”
miratohen ligje e bëhen shumë gjëra, për të cilat populli nuk do të ishte aspak dakord.
Prandaj, në këtë emision, do të shpjegojmë se fjala “popull” për fenë e krishterë,
kuptohet si “grigja e Hyjit”. Në Besëlidhjen e Vjetër, shpesh ndeshemi me profetë,
që ngrenë zërin kundër kombeve, të ndryshme nga Izraeli, i cili konsiderohej populli
i zgjedhur prej Zotit. Por nuk mungojnë tekste, ku këto kombe apo popuj të tjerë shihen
me sy tjetër, ku thuhet se Zoti kujdeset edhe për to, i udhëheq drejt një jete të
drejtë, në mënyrë që të shëlbohen prej Tij. Shembull për këtë është Jona, i cili dëshmon
se si Zoti kujdeset edhe për Niniven, kryeqytetin asir, tradicionalisht kundërshtar
i popullit hebraik. Madje, në Librin e profetit Isaia lexojmë këtë bekim hyjnor: “Qoftë
bekuar populli im egjiptian, edhe vepra e duarve të mia, asiri, dhe trashëgimi im
Izraeli” (19,25). Le të shqyrtojmë përdorimin pozitiv të fjalës “popull”, që i
referohet Izraelit në Besëlidhjen e Vjetër e, Kishës, popullit të fituar nga Zoti,
në Besëlidhjen e Re. Zoti ka lidhur aleancë me popullin e vet. Siç thuhet në Besëlidhjen
e Vjetër, në Librin e Levitikut: “Unë do jem Zoti juaj e ju populli im” (Lev 26,12).
Për këtë arsye shpesh Zoti paraqitet si mbret, si bari, si kryetar, si udhëheqës,
pasi fjala hebraishte “segullah” tregon grigjën, që është pronësi e bariut e jo atë,
që bariu e kullot për llogari të dikujt tjetër. Ekziston një lidhje e pandashme ndërmjet
Zotit dhe popullit të vet. Në këtë kuptim, Zoti kujdeset, bekon, shuan urinë e i jep
të mira Izraelit, popullit të vet. Nuk mund të lëmë mënjanë edhe aspektin negativ,
që ka të bëjë me marrëdhëniet ndërmjet Hyjit dhe popullit të vet. Nganjëherë, populli
nuk i qëndron besnik Hyjit dhe zgjedh zota të tjerë. Është shembulli i Izraelit, i
cili me mëkatin e idhujtarisë, largohet nga Zoti e bëhet një komb i çfarëdoshëm, mbi
të cilin bie dënimi hyjnor. Por, sapo Izraeli pendohet, dashuria e përjetshme e Zotit
e kërkon menjëherë popullin e vet, duke e falur. Dëshira e Zotit mbetet pra, gjithnjë,
ajo që Shën Pali e përcakton si “formimin e një populli të pastër, që t’i përkasë”
(Titit 2,14).