(15.08.2009 RV)Sot Kisha katolike
kremtoi të Dielën e 20-të të Kohës së zakonshme gjatë viti kishtar. Përkujtoi
edhe Shën Shtjefnin, mbret i Hungarisë dhe Shën Rrokun, shtegtar.
Të hysh në
jetën e pasosur: dëshirë e realizueshme, po të ecim hap pas hapi në gjurmët e Zotit.
Na e kujtojnë Shenjtorët Euzebi, papë e martir dhe Shën Kjara e Montefalkos, abateshë
agostiniane, që do të kremtohen të hënën.
Shën Flori
e Lauri, martirë të Ulpianës, në Kosovë; Shën Agapito, martir e Shën Helena, perandoreshë,
në festën e tyre liturgjike, të martën, na kujtojnë se në krijesën e re nuk
merren fare parasysh pasuritë, fitimet, pozitat. Kush di të heqë dorë prej tyre që
tani, do të marrë si shpërblim njëqindfishin.
I zoti i vreshtit dëshiron të
marrë punëtorë të rinj në të gjitha orët e në të gjitha situatat: a jemi gati të punojmë
për të në të gjitha kushtet e mundshme? Na e bëjnë këtë pyetje shenjtorët,që
do të kremtohen të mërkurën: Gjoni Eudes, meshtar, themelues i Eudistëve;
Shën Siksti III, papë; Shën Manji, martir.
“O Zot, e di
se do të kem jetë vetëm duke bërë vullnetin tënd!” – brohorisim së bashku me Psalmistin
në liturgjinë e së enjtes, festë e Shenjtorëve Bernardi, abat e dijetar i kishës;
Samueli, profet e Shën Maria de Matias, virgjër, themeluese e Motrave Adhuruese të
Gjakut të Krishtit.
Në dashurinë e pakufishme të Jezusit për Hyjin e për të
afërmin përmblidhen të gjitha format e të gjitha shprehjet e dashurisë njerëzore e
hyjnore. Prandaj të duash Jezusin do të thotë edhe të duash si Jezusi. Ky është reflektimi
kryesor që përshkon liturgjinë e së premtes, ditëfeste e Shën Piut X, papë.
E
bekuar je, ti, o Mari, mbi të gjitha gratë! Kurora jote janë të zgjedhurit, besnikët
e ndërmjetësimit tënd amtar e të fjalës së Krishtit, që na bëri ne të gjithëve bijtë
e tu. Këtë na kujton të shtunën liturgjia, në kremtimin e Virgjërës Mari,
mbretëreshë.
E diela e ardhshme është e 21-ta e kohës së zakonshme gjatë vitit
kishtar.