Kardinali Arinze në Plenaren IX të ipeshkvijve të Azisë: “Eukaristia na impenjon në
ndihmë të të varfërve”.
(11.08.2009 RV)Eukaristia dhe vëmendja
për të varfërit, ishin në qendër të homelisë së kardinalit Frensis Arinze, i dërguar
i Papës në Asamblenë Plenare të Federatës së Konferencave Ipeshkvnore Aziatike, që
u hap sot në Manila. “Ta jetosh Eukaristinë” është tema e Plenares, që do të vijojë
deri më 16 gusht. “Në atmoseferën e një zhvillimi të jashtëzakonshëm ekonomik e
teknologjik, Azia e shikon popullin e vet të varfër e të vuajtur, të shtypur e të
ndrydhur, pa strehë e nevojtar”: kështu i përshkroi kardinali Arinze kushtet në të
cilat jeton Kisha në Kontinentin, që përfshin 60% të njerëzimit e që vijon të tronditet
edhe nga fatkeqësi të rënda të natyrës. Eukaristia është pasuri shpirtërore e Kishës,
është forcë që shndërron. Ta jetosh Eukaristinë do të thotë t’u çosh Krishtin të varfërve
të Azisë. Eukaristia na impenjon në ndihmë të të varfërve. E lumja Nënë Tereza e Kalkutës
dhe motrat e saj e jetuan e vijojnë ta jetojnë forcën shndërruese të Eukaristisë.
E është pikërisht kjo forcë – theksoi i dërguari i Papës - që duhet të na nxisë të
kërkojmë mënyra të reja për t’i ndihmuar të varfërit, që të shpëtojnë nga varfëria
e ta jetojnë sa më denjësisht jetën e tyre. Zoti nuk do – pohoi kardinali Arinze,
duke cituar ‘Gaudium et Spes - që disa t’i kenë të gjitha të mirat e kësaj bote, duke
krijuar një oazë kënaqësish, ndërsa shumica jeton në shkretëtirën e mjerimit. Kardinali
vuri theksin edhe mbi domosdoshmërinë e bashkimit të ipeshkvijve me Papën, me njëri-tjetrin,
me meshtarët, rregulltarët e laikët. Kujtoi, më pas, edhe lidhjet me të tjerët,
duke u nisur nga të krishterët, që nuk janë ende në bashkim të plotë me Kishën katolike
e duke vijuar me besimtarët e feve të tjera. Lidhur me Eukaristinë, Hirësia e Tij
theksoi se Kremtimi eukaristik nuk është shërbim ekumenik, por kremtim që përkon me
bashkimin e plotë kishtar. Prandaj mundësia për t’i dhënë Kungimin një të krishteri,
familja fetare e të cilit nuk është në bashkim të plotë me Kishën katolike, është
e rrallë e në përputhje me dokumentet zyrtare të Kishës. Ndërsa kur është fjala për
myslimanët, hinduistët, budistët ose besimtarë të tjerë, këshilloi të mos ftohen në
kremtime, pa u dhënë shpjegimet e nevojshme. Theksoi me forcë edhe se ‘ungjillëzimi
nuk është prozelitizëm”.