Afganistan: raketa të talebanëve mbi Kabul, objektivi ishte aeroporti

(04.8.2009 RV)Afganistan drejt zgjedhjeve, sulmohet me raketa Kabuli. Në Afganistan me afrimin e zgjedhjeve presidenciale të 20 gushtit, rritet dhuna. Kabuli është goditur sot në agim nga talebanët me së paku tetë raketa duke shkaktuar viktima, dëme të mëdha e shumë të plagosur. Sulmi i organizuar nga talebanët ka goditur në orët e para të mëngjesit zonën diplomatike të ambasadave, ku gjendet edhe shtabi i përgjithshëm i Natos.
Talebanët paralajmëruan se ky ishte vetëm fillimi e se ofensiva do të vazhdojë.
Duke marrë përsipër sulmin e kryer, një zëdhënës i talebanëve, konfirmoi se qëllimi i akteve është të tregohet se qeveria afgane nuk është në gjendje të garantojë sigurinë në Kabul, vetëm pak ditë para zgjedhjeve presidenciale të 20 gushtit.