Арцыбіскуп Паоло Пэццы адзначае добрыя адносіны паміж дзяржавай і Касьцёлам
Арцыбіскуп Паоло Пэццы, Ардынарый архідыяцэзіі Маці Божай у Маскве (Расія),
выказаў задавальненне ў сувязі з паляпшэннем адносінаў паміж Каталіцкім Касцёлам і
расійскім урадам. Пра гэта арцыбіскуп заявіў ў інтэрв’ю газеце «L'Osservatore
Romano». «У Расійскай Федэрацыі ўзнікаюць канкрэтныя пазітыўныя знакі паляпшэння адносінаў
паміж Каталіцкай супольнасцю і ўладамі, што дае надзею на добрую будучыню», — адзначыў
арцыбіскуп. Паоло Пэццы сказаў, што дадзены факт сцвярджае пра «ўстанаўленне
і рост паўнавартасных дыпламатычных адносінаў паміж Папскім пасадам і Расійскай Федэрацыяй»,
і дадаў, што паляпшэнне адносінаў адбываецца на ўсіх дзяржаўных узроўнях.
Кажучы пра тэндэнцыю, якая склалася ў краіне, Ардынарый выказаў упэўненасць, што яна
магла б дапамагчы знайсці рашэнне ў некалькіх пытаннях, звязаных з існаваннем Касцёла
ў Расіі, а менавіта ў прызнанні Каталіцкай супольнасці і вызначэнні месцаў для малітвы.
Між іншым, арцыбіскуп Паоло Пэццы прызнаў існаванне пэўных праблем у асобных раёнах.
«Тым не менш, там, дзе існуюць цяжкасці, мы заўважаем вялікую цікавасць і ўдзел галоўных
палітычных уладаў у вырашэнні нашых праблем», — адзначыў іерарх «Мы павінны
разумець, што наша надзея абапіраецца на веру, а яна — гэта менавіта тое, што дае
нам аптымістычны і канструктыўны прагноз у нашых адносінах з палітычнымі сіламі»,
— падсумаваў арцыбіскуп напрыканцы размовы.