Papa në përfundim të koncertit në Kastel Gandolfo: bukuria do të fitojë mbi të keqen
dhe errësirën e botës, në se veprojmë mirë.
(03.08.2009 RV)Mirësia e bukuria
e Krijimit të Hyjit, do të fitojnë mbi pikëllimet e botës: këtë tha mbrëmë Papa, në
përfundim të koncertit, dhënë për nder të tij në Oborrin e brendshëm të Pallatit Apostolik
të Kastel Gandolfos, nga orkestra e Dhomës bavareze e Bad Brukenaut, drejtuar nga
oboisti Albreht Majer. U luajtën kompozime nga Bah, Moxart e Biten. Papa, duke
folur në gjuhën gjermane, u shprehu vlerësimin e tij muzikantëve, të cilëve u kërkoi
ndjesë se, për herë të parë, nuk mundi të duartrokasë si duhet gjatë një koncerti
kaq të bukur, për shkak të aksidentit në dorën e djathtë. U shpreh, pastaj, i mrekulluar,
për cilësitë e oboes, një copë druri, nga i cili mund të gurrojë një kozmos i vërtetë
muzikor: “Und das bedeutet…” Kjo tregon – shtoi
– se mbarë Krijesa është plot me premtime e se u la në dorë njeriut që të shfletojë
së paku ndonjë faqe të këtij libri plot me premtime, duke pëdorur jo vetëm forcën
e arsyes, por edhe atë të zemrës, për të shkuar në kërkim të premtimeve më të thella”. Një
orë parajsore – e quajti Papa mbrëmjen muzikore – që i krijoi mundësitë të shijojë,
përmes tingujve, bukurinë dhe mirësinë e Krijimit: “Und es ist nicht eine
Flucht…” “E kjo – tha – nuk është arratisje nga mjerimet e kësaj
bote e nga e përditshmja e saj, sepse nuk mund t’i bëjmë ballë së keqes e errësirës,
vetëm në se besojmë në të mirën, e do t’ia dalim të besojmë në të mirën, vetëm në
se mund ta provojmë e ta jetojmë si realitet”. Më pas Papa muzikant shtoi,
plot besim e shpresë për ardhmërinë e njerëzimit: E ne, në këtë orë, pamë e
dëgjuam se është një pjesë e botës, që nuk u shemb pas Kullës e mburrjes së Babelit:
është muzika, një gjuhë që e kuptojmë të gjithë, që prek zemrat e ne të gjithëve.
E kjo për ne nuk është vetëm garanci, që na siguron se mirësia, bukuria e Krijimit
të Hyjit nuk u shkatërrua, se ne jemi të thirrur e të aftë të punojmë për të mirën,
për të bukurën, por është edhe premtim, që na siguron se bota e pritme do të vijë,
se Zoti fiton, se e bukura dhe mira fitojnë!”. Mos të harrojmë: muzika është
ngushëllim e prehje, në mundimin e përditshëm – tha në përfundim Papa – e për këtë
nuk mund të mos u shprehim mirënjohjen tonë muzikantëve!