Papa atletëve të Kampionatit botëror të notit: “Kampionë në sport e në jetë”
(01.08.2009 RV)Papa Benedikti XVI
u takua sot në Pallatin Apostolik të Kastel Gandolfos me trajnerët, drejtuesit dhe
atletët e skuadrave të shteteve, që marrin pjesë në Kampionatin Botëror të Notit,
i cili përfundon nesër në Romë. Papa priti një delegacion prej mëse njëmijë vetësh,
që përfaqësonin 183 vende dhe mëse 4 mijë atletë e trajnerë. Gjallëria e rinisë,
që nuk i shmang stërvitjet e rënda dhe pranon me dëshirë sakrifica e privime, është
baza për një shfaqje të mrekullueshme disipline e humaniteti, bukurie artistike e
vullneti të paepur. E gjithë kjo – pohoi Papa – përbën një leksion të rëndësishëm
për jetën: “Sporti, i praktikuar me pasion e me etikë, sidomos për rininë,
bëhet palestër e agonizmit të shëndoshë dhe e përsosjes fizike, shkollë formimi vlerash
njerëzore e shpirtërore, mjet i privilegjuar për zhvillimin personal e për kontaktin
me shoqërinë”. Kisha, theksoi Ati i Shenjtë, e ndjek dhe kujdeset për sportin,
i cili nuk është qëllim në vetvete, por mjet i çmueshëm për formimin e personit: “Edhe
në Bibël gjejmë referime interesante për sportin si imazh i jetës. Për shembull, Shën
Pali Apostull e quan një vlerë të vërtetë njerëzore, e përdor jo vetëm si metaforë
për të ilustruar ideale të larta etike dhe asketike, por edhe si mjet për formimin
e njeriut dhe si përbërës të kulturës e të qytetërimit të tij”. Gjuha e sportit
– shpjegoi Papa – është universale dhe e përshtatshme sidomos për brezat e rinj. Është
e rëndësishme që përmes sportit të përçohen mesazhe pozitive, që kontribuojnë në ndërtimin
e një bote më vëllazërore e më solidare: “Ju, të dashur atletë, jeni model
për bashkëmoshatarët dhe shembulli juaj mund të jetë vendimtar për ta e për ndërtimin
e së ardhmes së tyre. Të jeni pra kampionë në sport e në jetë!” Dy kampionë
botërorë, gjermani Paul Biderman dhe italiania Federika Pelegrini i dhuruan Papës,
në emër të atletëve, serinë e medaljeve të arta për çdo disiplinë dhe peshqirin, tutën
e kufjen e pishinës.