Papa Benedikti XVI ndodhet që dje në Kastel Gandolfo
(30.07.2009 RV)Pas pushimeve në Lë Kombë të Vale d’Aostës, Benedikti XVI u
kthye dje në Romë, për të shkuar në rezidencën verore të Kastel Gandolfos. Është tashmë
liqeni i mirënjohur i këtij vendi, ai që shoqëron shëtitjet, takimet dhe audiencat
në qytetin lacial. Pas mbërritjes, Papa i përshëndeti kështu ata që e pritën: “Sapo
jam kthyer nga mali. Pavarësisht nga aksidenti im i vogël, kalova ditë shumë të bukura,
por tani jam i lumtur që ndodhem në Kastel Gandolfo, me ju, në këtë qytet të vogël
e të bukur, e shpresoj që të qëndroj me ju për disa javë”. Edhe familja e
madhe e punonjësve të Vilave Papnore ka marrë të gjitha masat që Ati i Shenjtë të
kalojë një periudhë të qetë pune e pushimi, siç na shpjegon drejtori i Vilave, Saverio
Petrilo: “Ne përgatitemi të kemi gjithçka në rregull për t’i garantuar mbështetjen
logjistike pushimeve të Papës. Kjo është periudha më e bukur e punës sonë, jemi të
vetëdijshëm se i shërbejmë drejtpërdrejt Atit të Shenjtë, prandaj personeli bën gjithçka
me gatishmëri dhe me entuziazëm të madh. Si zakonisht, Ati i Shenjtë do të kalojë
një periudhë pune e pushimi. Që gjatë kësaj jave kemi takime të ndryshme, duke filluar
me audiencën e së shtunës paradite për sportistët, të cilët ndodhen në Romë për kampionatin
botëror të notit. Të dielën do të kemi Lutjen e Engjëllit të Tënzot dhe pasdite, një
koncert. Të mërkurën, audienca e përgjithshme do të zhvillohet në Kastel Gandolfo.
Prandaj, pushimi është shumë relativ”. Ndër njerëzit që pritën Papën në Kastel
Gandolfo ishte edhe një murgeshë shqiptare, motër Mire Shpella e Oblateve të Zojës
Rruzare. Ta dëgjojmë, në mikrofonin tonë