Përfundojnë pushimet e Papës në Lë Kombë:'Këtu përjetova paqen qiellore'
(29.07.2009 RV)“Keni qenë si ‘engjëjt
e rojës’, të matur e veprues”. Me këto fjalë Benedikti XVI falënderoi sot anëtarët
e ndryshëm të Forcave të rendit e të trupave të tjera, të cilët këto 17 ditë i garantuan
sigurinë gjatë pushimeve në Lë Kombë të Vale d’Aostës. Gjatë takimit, organizuar rreth
mesditës në livadhin para selisë saleziane, që e përbujti, Papa kujtoi edhe thyerjen
e kyçit të dorës, ngjarje të cilën – siç u shpreh vetë Ati i Shenjtë – e jetoi si
“ftesë nga ana e Zotit për të qenë i përvuajtur”. Një përshëndetje e shkurtër,
plot mirënjohje, përshkuar nga një humor i hollë, gatitur me fjalë që dalin nga zemra,
edhe kur të bëjnë të vësh buzën në gaz. Kështu u nda Benedikti XVI nga ata – e ishin
disa qindra vetë - që e rrethuan këto dy javë, duke krijuar një rrjet mbrojtjeje
njerëzore, pothuajse të padukshme, po të kemi parasysh numrin jo të paktë e zonën
relativisht të kufizuar, ku ishin vendosur. Të pranishëm në këtë përshëndetje prekëse,
përfaqësues të Policisë, të Mbrojtjes civile, të Zjarrfikësve, të Inspektoriatit të
Policisë pranë Vatikanit, të Xhandarmërisë dhe të Shërbimeve Shëndetësore të Vatikanit.
Të gjithë të mbledhur për këtë përqafim simbolik nga ana e Papës: “Të dashur
miq, në përfundim të këtyre dy javëve të pushimeve, mund t’ju them me gjithë zemër
vetëm: ‘faleminderit’ për shërbimin kaq të aftë, të matur e veprues. Ishit si engjëjt:
engjëjt janë të padukshëm, por të gjithpranishëm. Kështu edhe ju. Ishit të padukshëm
për mua, por gjithnjë veprues”. Benedikti XVI tha se i kaloi ditët e pushimit,
i zhytyr në një paqe qiellore, në një heshtje të ndërprerë vetëm nga tingujt e Krijuesit,
domethënë nga këngët e zogjve. Papa e vlerësoi lart edhe bukurinë natyrore të Lë Kombë,
soditjen e së cilës nuk ia trazoi aksidenti në kyçin e dorës. Duke u rikthyer tek
koncepti i engjëjve ruajtës, Ati i Shenjtë foli për ta me simpati e thellësi shpirtërore: “Për
fat të keq, engjëlli im ruajtës nuk e ndaloi aksidentin, duke ndjekur, sigurisht,
‘urdhëra nga lart’… ndoshta Zoti deshi të më jepte një mësim më të thellë durese e
përvujtërie, duke më siguruar më shumë kohë për lutje e meditim”. Pasdite,
rreth orës 16. 30, Benedikti XVI priti për vizitën e lamtumirës, ipeshkvin e Aostës,
imzot Gjuzepe Anfosin, autoritetet zonale dhe drejtuesit e komunës së Introdit. Më
pas u nis me helikopter drejt aeroportit Torino-Kasele e, prej aty, me avion drejt
aeroportit Romë-Çiampino. Së fundi, me auto, Papa arriti në selinë papnore të Kastel
Gandolfos. Për një përmbledhje të shkurtër të ceremonisë së paradites, në mikrofonin
tonë, drejtori i Sallës vatikanase të Shtypit, Atë Federiko Lombardi: Përgjigje:
- Ky është një rit i nevojshëm e i bukur në përfundim të çdo qëndrimi të
Papës në selitë verore. Papa, në sa ecte në shtegun e lulishtës së selisë, u takua
me një grup të rinjsh salezianë – rreth 35 – të inspektorisë së Piemontit, mbledhur
këtu, në Vale d’Aosta, për një takim formues: i përshëndeti, së bashku me inspektorin
e tyre, me shumë ngrohtësi. Pastaj shkoi atje, ku të dielën e kaluar kremtoi lutjen
e Engjëllit të Tënzot. Aty, ku zakonisht rrinë besimtarët, ishin radhitur me rregull
të madh, trupat e ndryshme, që kryen shërbimin për garantimin e sigurisë e të pushimeve
të qeta të Papës. Ati i Shenjtë u drejtoi një përshëndetje të këndshme, me humor
të hollë, duke i krahasuar me engjëjt ruajtës e, më pas, po në këtë livadh, bëri
foto me grupet e ndryshme të pranishme. Edhe gazetarët bënë fotografi me Papën e munden
kështu t’i drejtojnë edhe ndonjë pyetje, duke folur krejt lirisht me Atin e Shenjtë.
Papa ishte në formë shumë të mirë: mund të themi, prandaj, se pavarësisht nga aksidenti
i vogël, periudha e pushimeve në Vale d’Aosta pati rezultatin e dëshiruar.
Pyetje:
- Ç’bilanc mund të bëni nga këto pushime në Vale d’Aosta?
Përgjigje:
- Bilanc pozitiv. Si e dimë të gjithë, ishte pakëz më ndryshe, nga sa qe
parashikuar, pra nuk u shtuan shumë rreshta në kapitujt e fundit të Librit mbi Jezusin,
por vendin e shkrimit e zuri reflektimi, leximi e lutja, edhe si pasojë e aksidentit.
Gjithsesi, siç e tha me shaka edhe vetë Papa, njeriu mëson gjithnjë e nga gjithçka,
prandaj edhe aksidenti pati frytet e veta shpirtërore.