Eprori i përgjithshëm i Jezuitëve, Atë Adolf Nicolàs, për vizitë në Afrikë
(29.07.2009 RV)Eprori i përgjithshëm i Shoqërisë së Jezusit, Atë Adolf Nikolàs,
ndodhet përsëri në Afrikë, e pikërisht në Buzhumbura të Burundit, ku më 22 deri më
27 të këtij muaji, u mbajt Kongresi Botëror i ish-nxënësve të jezuitëve. Atë Nikolàs
e nisi vizitën më 25 korrik, duke u takuar me autoritetet civile e fetare të Burundit
e, më pas, vizitoi Yezu Mwiza, qendër në shërbim të të sëmurëve nga Sida. Më 26
korrik u takua me ish-nxënësit e me sivëllezërit jezuitë, të pranishëm në Buzhumbura,
për ta vijuar vizitën në veprat kryesore të Shoqërisë së Jezusit, në Burundi, posaçërisht
në qendrën shpirtërore të Kiririt. Nga Buzhumbura u nis për në Bukavu, në Republikën
Demokratike të Kongos, në kufi me Ruandën, për të vizituar qendrat e jezuitëve në
këtë qytet: shtëpinë e ushtrimeve shpirtërore Amani, famullinë e sidomos, kolegjin
Alfazhiri, ku u takua me jezuitët e zonës, me profesorët, bashkëpunëtorët dhe miqtë
e Shoqërisë. Kaloi, më pas, në Ruandë, duke u ndaluar në Siangugu, jo larg nga
Bukavu, seli e noviciatit e në Kigali, kryeqytet i vendit, ku jezuitët janë të pranishëm
me një mori veprimtarish. I nisi takimet në Qendrën Christus për ushtrime shpirtërore,
ku më 6 prill 1994 u masakruan 17 vetë: gjashtë të reja të Lëvizjes Vita et Pax, që
po bënin ushtrimet shpirtërore, katër priftërinj dioqezanë e disa vullnetarë. Ndërmjet
tyre, atë Mahame, 67 vjeç, jezuiti i parë ruandez. Pikërisht në këtë vend, një vit
më parë, u hap edhe shkolla fillore e Shën Injacit e cila, më pas, do të bëhet shkollë
8 vjeçare e me kohë, ndoshta edhe kolegj universitar.Në Kigali është edhe selia kryesore
e zonës Ruandë-Burundi. Këtu, pranë Qendrës Christus, u mbajt sot takimi i të gjithë
jezuitëve. Nesër, nata e festës liturgjike të Shën Injacit, themelues i ‘Shoqërisë
Jezus’, Atë Nicolàs do të rikthehet në Romë.