Orët e fundit të pushimit të Benediktit XVI në malet e Lë Kombë. Komuna e Introdit
do ta shpallë “Qytetar nderi”.
(28.07.2009 RV)Po përfundon tashmë
pushimi i Papës Benedikti XVI në Vale d’Aosta. Nesër pasdite, pasi të përshëndesë
Forcat e rendit dhe autoritetet lokale, Ati i Shenjtë do të largohet nga Lë Kombë
për të shkuar në Kastel Gandolfo, pranë Romës. Ndërkaq, ndërsa njerëzit presin t’i
japin Papës përshëndetjen e fundit për këtë verë, komuna e Introdit ka vendosur ta
shpallë Benediktin XVI “Qytetar nderi”. Në mikrofonin tonë, drejtori i Sallës së
Shtypit të Radio Vatikanit, atë Federiko Lombardi tregon se si po i kalon Papa
orët e fundit në Vale d’Aosta: Me qetësi të madhe, duke vazhduar leximin, reflektimin,
lutjen, shëtitjet e zakonshme mbrëmësore, përveç atyre më të shkurtra pas buke. Nesër,
kemi përshëndetjen e të gjithë atyre – e nuk janë pak – që kanë bashkëpunuar për t’i
siguruar Atit të Shenjtë një qëndrim të qetë e të sigurtë në Lë Kombë. Mbrëmë, në
shtëpinë e salezianëve u mbajt darka tradicionale e falenderimit për autoritetet e
Vale d’Aostës, për autoritetet civile dhe ushtarake e për mjekët e spitalit. Imzot
Genshvain, sekretari i Papës, solli përshëndetjen e Atit të Shenjtë, i cili do t’i
falenderojë personalisht nesër këta persona, pasi – nuk duket – por edhe një periudhë
qetësie për Papën sjell me vete një organizim e një impenjim të madh, që të gjithë
e bëjnë me vullnet e gëzim, por që ka ndërlikimet e veta. Atmosfera e krijuar në vite
ndërmjet personalit vatikanas që ndjek Papën, personelit të Shtëpisë së salezianëve,
Forcave të rendit dhe autoriteteve është vërtetë një atmosferë bashkëpunimi dhe përzemërsie.
Kjo shihej mbrëmë nga fjalët e presidentit të Rajonit, Augusto Rolandin, nga ato të
presidentit të Këshillit rajonal, Albert Çerize e në veçanti, nga fjalët e kryebashkiakut
të Introdit, Osvaldo Naudin, i cili edhe nga Papa quhet me një batutë “kryebashkiaku
i përjetshëm”, pasi është që prej 30 vjetësh në atë post. Pikërisht nga Këshilli
komunal i Introdit erdhi dje lajmi se Papa do të shpallet “Qytetar nderi”… Po,
komuna vendosi ta shpallë Papën “Qytetar nderi”, pastaj Papa duhet ta pranojë formalisht
këtë titull e në muajt e ardhshëm një delegacion i komunës duhet të vijë në Romë për
t’i dorëzuar titullin Atit të Shenjtë. Kështu është bërë edhe herët e tjera. Edhe
në të kaluarën, ka pasur komuna gjermane që e kanë shpallur Papën “Qytetar nderi”
e më pas ia kanë dorëzuar titullin gjatë një audience në Romë. Titull, që natyrisht,
Ati i Shenjtë do ta pranojë me përzemërsi e me falenderime për pritjen kaq të ngrohtë
që i rezervohet.