Vazhdon restaurimi i Bibliotekës së Vatikanit, e cila do të hapet në vitin 2010
(27.07.2009 RV)Dy vjet pas fillimit
të restaurimit të Bibliotekës së Vatikanit, pavarësisht nga mbyllja e saj për këtë
qëllim, janë shtuar disa shërbime. Për shembull është zgjeruar katalogu, që mund të
konsultohet përmes internetit, dhe është rritur riprodhimi fotografik i dorëshkrimeve.
Biblioteka do të hapet sërish për publikun në vitin 2010. Të dëgjojmë një bilanc
të punimeve të deritanishme nga prefekti i Bibliotekës, imzot Çezare Pazini: Dy
vjet kaluan tashmë, pra të themi kaluan dy të tretat e periudhës së mbylljes; mund
të them se disa gjëra janë zgjidhur përfundimisht. U transferua laboratori fotografik
dhe ai i restaurimit për të ristrukturuar ambientet: tani, laboratori fotografik është
kthyer aty ku ka qenë dhe është me të vërtet i bukur; kush e ka parë tri vjet më parë,
thotë se tani është plot dritë. Pas rreth 2 muajsh, edhe laboratori i restaurimit
do të kthehet në shtëpinë e vet e ne po punojmë me shpejtësi për këtë. Një punë tjetër
që dua të vë në dukje, interesante për studiuesit që presin të konsultojnë dorëshkrimet
– të cilat janë thesari ynë më i bukur, më i rëndësishëm – është fakti se dorëshkrimet,
edhe ato të ruajtura përkohësisht në Arkivin Sekret të Vatikanit, po kthehen në vendin
e tyre. Hap pas hapi, pasi janë transferime shumë delikate, por po hyjnë në Bibliotekë. A
ka nisma të veçanta për hapjen e Bibliotekës, për të cilat mund të na flisni që tani? Sigurisht!
Për shembull, një iniciativë është ajo e publikimit të vëllimit të parë të Historisë
së Bibliotekës Apostolike të Vatikanit. Historia e Bibliotekës në vëllime nuk ekziston,
sidomos nuk ekziston në një formë që mund të jetë e konsultueshme edhe nga kuriozët.
Vëllimi i parë do të flasë për historinë e hershme të Bibliotekës, pra na çon në gjysmën
e dytë të ‘400-ës e në dhjetëvjeçarët e parë të ‘500-ës, kur Papa Nikolò V caktoi
njerëz për mbledhjen e dorëshkrimeve, grumbullimin e tyre në bibliotekë, të cilën
e hapi për të gjithë, publikun e studiuesit.