Bashkëpunimi ndërmjet BE dhe Comece në fushën e emigracionit. Intervistë me Alesandro
Kalkanjo.
(21.07.2009 RV)Bashkëpunimi ndërmjet Komisionit të Konferencave Ipeshkvnore
të Bashkimit Evropian (Comece) dhe Bashkimit Evropian mbi temën e emigracionit vazhdon
të ecë përpara. Alesandro Kalkanjo, ekspert i emigracionit dhe i azilit flet
mbi temat kryesore që janë në qendër të këtij bashkëpunimi. Ta dëgjojmë:
Përgjigje:
Veprimtaria e Konferencave Ipeshkvnore të BE për emigracionin dhe azilin bën pjesë
në kuadrin e një bashkëpunimi ekumenik dhe tepër frytdhënës me organizmat e tjera
të Brukselit. Mund të tregoj këtu disa nga pikat që Komisioni i Konferencave Ipeshkvnore
të BE i quan më të rëndësishme në fushën e politikave të dhënies së azilit: të gjitha
politikat duhet të njohin dinjitetin e pamohueshëm të njeriut dhe ky duhet të jetë
parimi udhëheqës i çdo lloj politike në këtë fushë. Duke kaluar pastaj në disa pika,
disi më specifike, mund të përmend për shembull kërkesën për formimin e rojeve kufitare.
Temat e tjera kanë të bëjnë me të drejtën e asistencës fetare, në veçanti për ata
që mbahen në burg e që kanë bërë kërkesë për azil. Kërkohet që burgu të jetë vetëm
masë ekstreme dhe mbi të gjitha kërkohet që të gjenden alternativa për këtë gjë. Përsa
i përket kushteve të mikpritjes të azilkërkuesve, është bërë një kërkesë për identifikimin
e personave që cënohen në çastin kur paraqitet kërkesa për mbrojtje ndërkombëtare.
Duhet vlerësuar edhe mundësia e përfshirjes në botën e punës, që përbën një pikë veçanërisht
të rëndësishme për të lejuar integrimin e këtyre personave.
Pyetje:
A ka bashkëpunim, a ka vullnet nga ana e politikave evropiane për të reflektuar mbi
pikat që keni propozuar ju?
Përgjigje: Do të thosha se po. Mund të citoj
këtu dy shembuj. I pari ka të bëjë me propozimin e përhapjes së direktivave që kanë
të bëjnë me kushtet e mikpritjes të azilkërkuesve që aktualisht është në diskutim
në institucionet e BE-së. Parlamenti evropian në maj të këtij viti, miratoi një rezolutë
lidhur me bërjen publike të këtyre direktivave. Në këtë rezolutë është pranuar edhe
një kërkesë e jona, që ka të bëjë me asistencën fetare për azilkërkuesit e burgosur.
Një tjetër shembull të cilit mund t’i drejtohem ka të bëjë me rikthimin e refugjatëve
irakianë që gjenden në Siri dhe në Jordani.