У Горадні адбылося паседжаньне Беларуска-польскай кансультацыйнай камісіі па пытаньнях
гісторыка-культурніцкай спадчыны. На павестцы дня былі пытаньні, зьвязаныя
з рэстаўрацыяй Нясьвіскага замку, супольнага выкарыстаньня Аўгустоўскага каналу, а
таксама магчымасьць рэстытуцыі Лаўрышаўскага Эвангельля, якое захоўваецца цяпер у
Кракаве ў зборах музэю Чартарыскіх У паседжаньні, якое адбылося ў
авальнай залі Новага замку, прымалі ўдзел віцэ-міністры культуры Польшчы Томаш Мэрта
й Беларусі Ўладзімер Грыдзюшка, а таксама польскі амбасадар Генрык Літвін.
Віцэ-міністар культуры й нацыянальнай спадчыны Польшчы Томаш Мэрта паведаміў, што
ўжо зроблены электронныя копіі партрэтаў прадстаўнікоў роду Радзівілаў зь Нясьвіскай
калекцыі, якія патрапяць з Польшчы ў Беларусь да канца ліспапада бягучага году.
48 партэтаў, якія ў 1953 годзе ўрад БССР перадаў бясплатна ў Польшчу, сёньня знаходзяцца
ў зборах Нацыянальнага музэю ў Варшаве. У сваю чаргу намесьнік міністра
культуры Беларусі Ўладзімер Грыдзюшка паведаміў аб тым, што абмяркоўваецца пытаньне
перадачы пад дэпазыт музэю ў Нясьвіжы двух партрэтаў і двух прадметаў радзівілаўскага
сталовага посуду. Агулам беларускі бок просіць разгледзець магчымасьць выкананьня
копіяў 80-ці партэртаў Радзівілаў зь Нясьвіскай калекцыі, а таксама партрэтаў уладальнікаў
Мірскага замку ды копіяў мэблі й прадметаў дэкаратыўна-прыкладнога мастацтва, створаных
на тэрыторыі ВКЛ.