(12.07.2009 RV)Sot Kisha katolike kremtoi të Dielën e 15-të të Kohës
së zakonshme gjatë viti kishtar. Përkujtoi edhe Shën Gjon Gualbertin, abat dhe Shenjtorët
Naborin e Feliçin, martirë milanezë.
Të hënën do të kremtohen Shën
Enriku II perandor; Shën Esdra, skrribë dhe Shën Sila, dishepull i apostujve. Fillon
leximi i Librit të Daljes, epopeja e madhe e një populli skllav i cili, me ndëhyrjen
çlirimtare të Zotit, rigjen identitetin e vet. Edhe rruga në të cilën Jezusi na fton
të ecim, s’ është tjetër, veçse ‘dalje’ nga vetvetja, për t’u nisur drejt Atit qiellor.
Zoti i qorton rëndë qytetet, që i panë shenjat e mrekullitë, të cilat shoqëruan
predikimin e Jezusit, por nuk e njohën, nuk deshën ta besojnë. Qortimi vlen edhe për
ne, që të mos i shpërdorojmë dhuratat e hirit. Këtë na kujton, të martën, festa
liturgjike e Shën Kamilit de Lelis, meshtar, themelues i Kongregatës të Shërbëtorëve
të të Sëmurëve.
Të mërkurën do të përkujtohet Shën Bonaventura nga
Banjoregjio, kardinal, ipeshkëv i Albanos e dijetar i Kishës, françeskan. Në liturgjinë
e festës, Zoti, nga kaçuba e ndezur, e siguron shërbëtorin e vet, Moisiun: “Unë do
të jem me ty!”. Kur i beson detyrën e vështirë t’i prijë popullit drejt lirisë, është
gjithnjë përkrah tij, e ndihmon, i hap rrugën, që çon në kryerjen e misionit.
Të
enjten, Zoja e Karmelit na fton të gjithë t’i përgjigjemi thirrjeve të Zotit,
të vetmit mësues, që meriton të ndiqet: “Ejani pas meje”; “Mësoni nga unë, që jam
zemërbutë e i përvujtë!”.
Liturgjia e së premtes, ditëfeste e Shenjtorëve
Marçelina, virgjër, motër e Shën Ambrozit, ipeshkëv; Aleksi e Leoni IV papë, na kujton
se shpesh herë në Ungjill farizejtë paraqiten si roje të mëkateve të të tjerëve, të
vërteta qofshin, apo jo. Por mëkatet e tyre, që s’duan t’i shohin – e që ua kujton
Jezusi - janë shumë më të rënda. Kryesorja, nuk e kanë kuptuar fare ç’do të thotë
‘mëshirë e Zotit’.
Fjala e Zotit e së shtunës, kur Kisha do të kremtojë
festën eShën Emilianit martir; të Shën Brunos së Senjit, ipeshkëv e të Shën
Federikut, na kujton se mënyra si sillet Jezusi, e bën t’i ngjasë gjithnjë më shumë
shërbëtorit të Hyjit, kumtuar nga Izaia profet: me butësinë e tij i ndihmon njerëzit
në mjerimet e tyre fizike e shpirtërore, në sa tashmë kanë nisur të komplotojnë kundër
tij.
E diela e ardhshme është e 16-ta e kohës së zakonshme gjatë vitit kishtar.