Kryeministri Sali Berisha deklaron kabineti i ri qeveritar deri në 10 ditëshin e dytë
të gushtit
(10.7.2009 RV)Kryeministri Sali Berisha deklaroi dje në mbrëmje, gjatë një
emisioni televiziv, se "kabineti i ri qeveritar pritet të përcaktohet deri në 10 ditshin
e dytë të muajit gusht". I ftuar në një emision televiziv, Kryeministri Berisha
foli për situatën pas zgjedhore në vend, koalicionin me LSI-në për krijimin e qeverisë
së re, si dhe për reformat kryesore që pritet të kryhen gjatë këtij mandati qeverisës.
I pyetur se çfarë postesh pritet të marrë LSI në qeverinë e re, Kryeministri Berisha
u shpreh se "asgjë nuk është përcaktuar, pasi deri tani janë bërë diskutime programore".
"Koalicioni pas zgjedhur me LSI-në është një formë e re dhe e dobishme, i
diktuar nga rezultati. Por absolutisht unë do t'i ofroja koalicion LSI-së edhe sikur
të kisha 73 deputetë", tha Kryeministri Berisha. Ndërsa për sa i përket numrit
të portofoleve ministrore që do të ketë kabineti i ri qeveritar, Kryeministri Berisha
u shpreh se "kjo është çështje e negociatave". "Do të përcaktohet koalicioni
dhe më pas do të vendoset për emrat. Mund të largohen, mund të vijnë, por është koalicioni
ai që dikton", tha Kryeministri Berisha. Për sa i përket prioriteteve të qeverisjes
së ardhshme, Kryeministri u shpreh se "lëvizja e lirë është prioritet madhor, infrastruktura
gjithashtu, pasi do ta bëjë Shqipërinë evropiane". Në të njëjtën kohë, Kryeministri
u shpreh se "çdo reformë që do të realizohet ka nevojë për konsensusin e opozitës
në tërësi, si reforma në shëndetësi, në rritjen e pagave etj". Në zgjedhjet
parlamentare të 28 qershorit, sipas rezultateve paraprake të publikuara nga Komisioni
Qendror i Zgjedhjeve, koalicioni "Aleanca e Ndryshimit" , i drejtuar nga Partia Demokratike
fitoi 71 mandate, koalicioni "Bashkimi për ndryshim", i kryesuar nga PS fitoi 65 mandate,
ndërsa LSI-ja 4 mandate. Në datën 4 Korrik, Kryetari i Partisë Demokratike,
Sali Berisha, njëkohësisht Kryeministër i vendit ftoi Lëvizjen Socialiste për Integrim
të jetë pjesë e qeverisë së re që do të dalë nga zgjedhjet parlamentare të 28 qershorit,
një ftesë e cila u pranua nga LSI.