Në takimin e G8 i lihet vend në tavolinë edhe vendeve në zhvillim e sipër. I pamjaftueshëm
impenjimi për klimën sipas OKB.
(09.07.2009 RV)Nga Grup i Tetëshes
në Grup të Katërmbëdhjetshës. Kështu, pra takimi i G8 që po zhvillohet në Akuila u
zgjerua duke i lënë vend në tavolinë vendeve në zhvillim shto këtu edhe Egjiptin e
duke përfshirë në debatin për ekonominë, varfërinë dhe mjedisin edhe udhëheqësit e
vendeve më të varfra. Takimi i lartë i Akuilas, pra, po përpiqet që të kthehet
në një takim shpresash dhe premtimesh. Dje udhëheqësit e Italisë, SHBA, Kanadasë,
Francës, Japonisë, Gjermanisë, Mbretërisë së Bashkuar dhe Rusisë miratuan një dokument
të rëndësishëm për ekonominë, i cili përmban standardet ndërkombëtare që duhet të
zbatohen në mënyrë që të shmanget një krizë e re globale si kjo që po kalon bota tani. Por
e veçanta e ditës së sotme të punimeve qëndron në faktin se në të morën pjesë të gjitha
subjektet dhe organizatat e ftuara. Ndër temat e diskutimeve veçojmë: mjedisin dhe
luftën kundër varfërisë, probleme këto për të cilat sekretari i përgjithshëm i OKB-së
Ban Ki Mun, i cili arriti sot paradite në Akuila, mendon se nuk është bërë sa duhet.
Nga ana tjetër marrëveshja e arritur, dje e cila parashikon që nxehja e globit
deri në 2050 të mos i kalojë dy gradët centigradë si dhe uljen me 50% të gazrave ndotëse,
po ndesh në “kokëfortësinë” e Kinës dhe të Indisë. E vetmja gjë që dihet me siguri
është se dokumenti mbi klimën që do të miratohet nga Forumi i Ekonomive Kryesore –
ku përfshihen edhe vendet e G5 (Brazili, Kina, India, Meksika, Afrika e Jugut) si
edhe Australia, Indonezia, Korea e Jugut dhe Danimarka – do të njohë cakun e rritjes
së temperaturës mesatare globale me dy gradë centigradë. Organizatat jo qeveritare
të pranishme në Akuila e pritën me shpresë por edhe me shqetësim nismën shumëvjeçare
prej 15 miliardë dollarësh për zhvillimin ushqimor në vendet e varfra. Plani - të
cilin e bëri publik dje kryeministri italian Silvio Berluskoni - nuk është tjetër
veçse një propozim i administratës amerikane. Por sipas disa Organizatave joqeveritare
prapseprap kjo nuk është e mjaftueshme. Në mikrofonin tonë flet Luka de Fraia
i organizatës joqeveritare “Akshën Aid”. Ta dëgjojmë:
Përgjigje: Organizata
për Ushqimin dhe Bujqësinë (FAO) ka botuar disa statistika kohët e fundit që flasin
për përkeqësimin e kushteve të jetesës dhe të varfërisë nëpër botë, dhe duke parë
këto shifra ne kemi llogaritur se rreth 250 mijë persona në ditë, gjatë vitit të fundit
kanë rënë poshtë nivelit të varfërisë së skajshme. Është marramendës ky fakt, aq sa
ne theksuam se sikur nga ky takim i G8 të mos dalin iniciativa konkrete e të forta,
atëherë një gjysmë milioni persona rrezikohen nga uria vetëm këto tri ditë. Kontinenti
afrikan mbetet ende kontinenti ku përqindja e të uriturve është më e lartë se në të
gjithë botën. Është pothuajse 32% e Afrikës nënsahariane që vuan nga uria. Gjithashtu
në nivel global nuk duhet harruar se uria po rritet edhe në Azi, kontinent ky ku vitet
e fundit ka pasur një ulje të saj. Pra, gjendemi përpara një situate ku në vend që
të bëhen hapa para po bëhen hapa prapa.