Samiti G8 fillon punimet në Akuila, diskutim mbi reformën e ekonomisë botërore e tregtinë
ndërkombëtare.
(08.7.2009 RV)Samiti G8 filloi punimet
në Akuila, ku janë ballafaquar sot kryetarë shtetesh e qeverish të Kanadasë, Francës,
Gjermanisë, Italisë, Japonisë, Rusisë, Britanisë së Madhe e SHBA-së plus presidenti
i Komisionit Evropian e Suedia si presidente e radhës së Bashkimit Evropian. Klima,
kriza ekonomike e rregulloret e reja për financat janë ndër temat kryesore e kyçe
të samitit. Nuk merr pjesë presidenti i Kinës Hu Jintao, i cili është kthyer në vend
për shkak të përshkallëzimit të situatës në Ksinxhiang. Liderët e samitit të G8 në
Akuila diskutojnë mbi reformën e ekonomisë botërore e tregtinë ndërkombëtare.
Liderët e botës u mblodhën në Kazermën e Rojës së Financës të Kopitos, seli e
takimit të madh, ku nisën diskutimet për masat që duhen marrë lidhur me reformimin
e ekonomisë botërore dhe të tregtisë ndërkombëtare. Në tryezën e bisedimeve, dokumenti
i hartuar nga presidenca italiane, i cili me 12 rregullat e tij, urohet të arrijë
në krijimin e standarteve globale për një ekonomi më etike. Një vëmendje e veçantë
në këtë drejtim i kushtohet reformimit të institucioneve financiare dhe zhdukjes së
parajsave fiskale brënda vitit 2010. Boca e dokumentit, që parashikon edhe ndalimin
e çdo forme të proteksionizmit, pritet të miratohet nga pjesa më madhe e liderëve
të G8, prej atyre të OSBE-së, që dhanë kontributin për hartimin, si dhe të Fondit
monetar ndërkombëtar. Shumë të rëndësishme për organizatat jo qeveritare, që e ndjekin
nga afër takimin e rangut të lartë, bisedimet e pasdites për shkaqet e fenomenit të
varfërisë, e cila po thellohet gjithnjë më shumë në mbarë botën, dhe të rrugëdaljeve
të mundshme. Emergjenca më e rëndë vijon të mbetet ajo e sigurimit të ushqimit të
përditshëm, në një botë me 1 miliard e gjysëm njerëz të uritur. Pritet që, në përpjekjen
për ta shëruar këtë plagë të rëndë, të financohen 16 miliardë euro. Shifër e rëndësishme,
por që organizatat jo qeveritare, të pranishme në samit, e konsiderojnë të pamjaftueshme.
Sipas tyre, për luftën kundër varfërisë, duhen financuar së paku 23 miliardë dollarë
në vit, duke filluar që tani e duke vijuar deri në vitin 2012. Gjithnjë pasdite,
punimet patën në qendër të vëmendjes problemet e ambientit e të ndryshimeve klimaterike,
për të përfunduar, në mbrëmje, me një sesion kushtuar temave më delikate të politikës
ndërkombëtare. Përpjekje e përgjithshme, pra, për zgjidhjen e problemeve globale,
me vëmendje të veçantë edhe për fjalët e Benediktit XVI.