Պենետիկտոս ԺԶ Քահանայապետի ''Սէրը ճշմարտութեան մէջ'' շրջաբերական թուղթին ներկայացումը մամուլին։

Պենետիկտոս ԺԶ Քահանայապետի ''Սէրը ճշմարտութեան մէջ'' շրջաբերական թուղթին ներկայացումը մամուլին։

Ընկերային շրջաբերական թուղթերու երկար պատմութիւնը, սկիզբ առաւ 1891-ին "Rerum novarum" Նոր Բաներ շրջաբերական թուղթով։

Պենետիկտոս ԺԶ Սրբազան Քահանայապետի ընկերային առաջին շրջաբերական թուղթը լոյս տեսաւ Երեքշաբթի 7 Յուլիս 2009-ին ''Սէրը ճշմարտութեան մէջ'' վերտառութեամբ, նուիրուած՝ ամբողջական մարդկային զարգացումին սիրոյ ու ճշմարտութեան մէջ։

Այդ շրջաբերական թուղթը օղակ մըն է, Հռոմի Պապերու ընկերային շրջաբերական թուղթերու երկար շղթային, որ սկիզբ աոաւ 1891-ին "Rerum novarum" Նոր Բաներ երջանկայիշատակ Լեւոն ԺԳ Քահանայապետի շրջաբերական թուղթով։

Արդարեւ Քահանայապետները, գրեթէ ամէն տասնամեակին ընկերային շրջաբերական թուղթեր հրապարակած են։ Բարեյիշատակ Յովհաննէս Պօղոս Բ Պապը իր քահանայապետութեան 27 տարիներուն ընկերային երեք մեծ շրջաբերական թուղթեր հրապարակած է։ Լեւոն ԺԳ Պապը, իր շրջաբերական թուղթին մէջ, պաշտպանը կը հանդիսանայ բանւորներուն։ Այս շրջաբերական թուղթը մեծ դեր ունեցաւ աշխատասիրելու Եկեղեցւոյ ընկերային ուսուցումը։ Ան 1891-ի շրջաբերական թուղթին մէջ, խօսելով՝ ընկերային անկարգութիւններու մասին, խստիւ կը դատապարտէր թշուառութիւնը եւ անարդարութիւնը, որուն զոհ էին բանւորական դասը։

Ապա 40 տարի ետք, Պիոս ԺԱ Քահանայապետը 1931-ին դարձեալ ընկերային շրջաբերական թուղթ մը հրապարակելու պարտականութիւնը զգաց, այդ շրջանի ընկերա-տնտեսական վիճակը վերլուծելու եւ պատշաճ պատասխաններ տալու համար։ Երկրորդ աշխարհամարտի աւարտին, ընկերային նոր հարցեր ի յայտ եկան, երջանկայիշատակ Պիոս ԺԲ Քահանայապետը կարիքը զգաց ՜՜այլ շրջաբերական թուղթ մը հրապարակելու՝ համապատասխանելու ճարտարարուեստականացած ընկերութեան նոր հարցերու պատասխան տալու համար՝՝։ Յովհաննէս ԻԳ պապը 1961-ին ''Mater et Magistra '' Եկեղեցին մայր եւ մանկավարժ անունով՝ շրջաբերական թուղթ մը հրապարակեց ապա պաղ պատերազմի նոր դրութեան համապատասխանելու համար, 1963-ին դարձեալ հրապարակեց ''Pacem in terris'' խաղաղութիւն երկրի վրայ, կոչուած շրջաբերական թուղթը, ուր ցոյց կու տար կապը որ կայ տնտեսութեան ու խաղաղութեան կերտումին միջեւ։

1967-ին Պօղոս Զ. Պապի ''Populorum progressio'' ժողովուրդներու բարգաւաճումը, կը բացայայտէր թէ ընկերային հարցը դարձած է համաշխարհային հարց մը եւ բարգաւաճումը դարձաւ խաղաղութեան նոր անունը։ Ինչպէս ըսինք, Յովհաննէս Պօղոս Բ Քահանայապետը երեք շրջաբերականներով ճոխացուց Եկեղեցւոյ ընկերային վարդապետութիւնը։ Առաջինը լոկ ընկերային բնոյթ ունի ''Laborem exercens'' Մարդը աշխատանքին մէջ` հրապարակուած 1981-ին, Rerum novarum-էն 90 տարի ետք։ Սրբազան Հայրը կը բացայայտէր թէ տնտեսութիւնը պէտք է ըլլայ ի սպաս մարդուն, եւ ոչ թէ հակառակը։

Ապա 1987-ին ''Sollicitudo rei socialis'' Եկեղեցւոյ գործօն մասնակցութիւնը ընկերային հարցին շրջաբերական թուղթին մէջ, Նորին Սրբութիւնը դիմագրաւեց ընկերային հարցը համաշխարհային աստիճանի վրայ։

Հուսկ մէկ Մայիս 1991-ին '' Centesimus annus'' հարիւր տարի առաջ, շրջաբերական թուղթին մէջ Սրբազան Հայրը վերլուծում կը կատարէր առեւտուրի շուկային նկատելով զայն ՜՜ մարդկային ստեղծագործութիւն՝՝ ընդգծելով նախապատուութիւնը արժէքներուն ու մշակոյթին։ Բացի այս շրջաբերական թուղթերէն կան նաեւ բազմաթիւ ընկերային վաւերաթուղթեր։ Նոյնպէս ''Gaudium et Spes'' ''մարդոց ուրախութիւններն ու յոյսերը'' Վատիկանեան Բ Տիեզերական ժողովի 1965-ի վճիռը կ'արտայայտուի Եկեղեցւոյ ու աշխարհի յարաբերութեան մասին։