Kard.Toran në Kongresin ndërfetar të Kazakistanit: njerëzimi i bashkuar mund të gjejë
vlera etike të përbashkëta e të jetë më solidar.
(07.07.2009 RV)“Uniteti i familjes
njerëzore është themeli më i fortë për solidaritetin global e baza e kërkimit të vlerave
të përbashkëta etike të cilat, për fat të mirë, në kohën tonë, vijojnë të shikohen
me interes gjithnjë në rritje”. Këtë nënvizoi kardinali Zhan-Lyi Toran, kryetar i
Këshillit Papnor për Dialogun Ndërfetar, në fjalimin e mbajtur gjatë Kongresit të
tretë të liderëve të feve botërore e tradicionale, organizuar këto ditë në Astana
të Kazakistanit.
“Përcaktimi i vlerave etike e shpirtërore për një etikë universale;
gjetja e rrugëve të mundshme të dialogut e të bashkëpunimit; vlerësimi i perspektivave
të solidaritetit, posaçërisht në kohë krize”. Rreth këtyre temave diskutuan dhe shkëmbyen
përvojën, përfaqësuesit e konfesioneve kryesore fetare, së bashku me delegatët e OKB-së,
të OSBE-së e të Unesko-s, me rastin e Kongresit të tretë të liderëve të feve botërore
e tradicionale. Themelore për të favorizuar dialogun ndërmjet njerëzve me kultura
e fe të ndryshme – pohoi kardinali Toran – fjalimi i të cilit u botua edhe në ‘L’
Osservatore Romano’- është gjetja e vlerave të përbashkëta morale, duke respektuar
plotësisht larminë e traditave. Vendimtare në këtë drejtim është etika, që mund të
formojë ndërgjegjen njerëzore e t’i ndihmojë besimtarët të zgjedhin të mirën e jo
të keqen. Kardinali Toran, i cili kryesonte delegacionin papnor, citoi edhe Deklaratën
universale të të drejtave të njeriut, duke e quajtur ‘një nga shprehjet më të larta
të ndërgjegjes në historinë moderne, që kontribuoi për t’i bërë njerëzit të vetëdijshëm
për pasurinë e vlerave të familjes njerëzore e të dinjitetit të saj. Sipas kardinalit
Toran - besimtarët mund ta ndriçojnë të afërmin, duke i mësuar se njerëzit u krijuan
sipas shembëlltyrës së Zotit. U krijuan të barabartë. Zoti u dha të drejta të patjetërsueshme,
ndërmjet të cilave, kryesoret, e drejta për të jetuar, për të qenë të lirë, për të
kërkuar e për të gjetur lumturinë. Kongresi i Astanës, që mblidhet çdo tri vjet,
mbahet me nismën e presidentit të Republikës së Kazakistanit, Nursulltan Nazarbajev. Në
vendin aziatik – lexojmë në një notë – vitet e fundit është hartuar një platformë
e veçantë shpirtërore për dialogun ndërfetar. Nevoja për pajtimin ndërmjet feve pranohet
nga shumë personalitete kishtare, që po përgatisin vija të posaçme veprimtarie për
ta arritur këtë objektiv.