Iran. Rafsanxhani nuk e pranon rezultatin e votimeve.
(07.07.2009 RV)Në Iran nuk ka paqë. Sipas sitit internet të gazetës Los Anxhelos
Tajms, lëvizja politike “Kargozoran” e drejtuar nga ajatollah Akbar Hashemi Rafsanxhani,
nuk i njeh rezultatet e zgjedhjeve të fundit të zhvilluara në Iran. “Deklarojmë se
rezultati është i papranueshëm për shkak të kushteve të papërshtatshme në të cilat
është zhvilluar procesi zgjedhor, për manipulimet e dukshme si edhe për njëanshmërinë
e hapur që kanë treguar disa anëtarë të Këshillit të Rojeve, të cilët mbanin krahun
e Ahmadinexhadit." Në Iran, siç komentojnë shumë media perëndimore, po përplasen
dy grupime të mëdha, ai reformist i Rafsanxhanit dhe ai ultrakonservator që drejtohet
nga ajatollah Khamenei. Kjo ndeshje ndërmjet këtyre forcave politike është reale dhe
u konfirmua edhe nga vetë gjenerali Jadollah Javani, komisari politik i Rojeve të
Revolucionit. Ndërsa mbrëmë, ministri i jashtëm francez Bernard Kushner i kërkoi
autoriteteve iraniane të lirojnë menjëherë shtetasen franceze Klotildë Reis, 23 vjeçe,
e cila është arrestuar dhe akuzohet për spiunazh. Reis në të vërtetë vetëm sa ka fotografuar
me celular protestat e opozitës në qytetin Isfahan. Po ashtu edhe opozita iraniane
kërkoi që të lirohen të gjithë të arrestuarit e ditëve të kaluara.