Varret e Apostujve në Romë, pikë prej nga feja përhapet deri në kufijtë e botës: reflektim
i Atë Federiko Lombardit.
(05.07.2009 RV)Roma, “kryeqytet i fesë së krishterë”, sepse prej dymijë vjetësh
ruan varret e Shën Pjetrit e të Shën Palit. E gjatë këtyre ditëve, më shumë se kurrë,
tërhoqi vëmendjen e besimtarëve, të shtegtarëve, por edhe të atyre që dinë t’i çmojnë
drejtë vlerat fetare e kulturore të një qytetërimi. Kërkimet shkencore në sarkofagun
paolin e vunë në plan të parë këtë aspekt, mbi të cilin ndalet edhe drejtori i përgjithshëm
i Radio Vatikanit, Atë Federiko Lombardi:
“Njoftimi,
që dha Benedikti XVI për rezultatet e para të kërkimeve shkencore mbi trupin e sarkofagut,
ruajtur nën elterin e Bazilikës së Shën Palit jashtë Mureve, shkaktoi emocion të kuptueshëm
në botën katolike, në përfundim të Vitit kushtuar Apostullit të Popujve. Kjo duket
se konfirmon – thotë Papa - traditën e njëzëshme e të pakundërshtuar, sipas të cilës
këtu ruhen pikërisht eshtrat e Palit Apostull. Të njëjtin emocion patën shkaktuar,
në kohën e tyre, rezultatet e thelluara të kërkimeve arkeologjike, kryer nën Bazilikën
e Shën Pjetrit sipas dëshirës së Papës Piu XII, që kofirmuan, pa hijen e dyshimit,
se pikërisht poshtë elterit qëndror ishte varri i Apostullit Pjetër, në nekropolin
e lashtë vatikanas. Roma është qendra e krishterimit jo sepse ishte kryeqytet
i Perandorisë së lashtë, por sepse këtu princat e Apostujve pësuan martirizimin e
po këtu, u ruajtën me nderim të thellë varret e tyre. Ndonëse në kulturën tonë moderne
nderimi i relikeve ndjehet më pak se në të kaluarën, vendet dhe kujtimet konkrete
të jetës e të dëshmisë së atyre, që na paraprinë e, posaçërisht, të Shenjtorëve, vijojnë
të ruajnë një vlerë jashtëzakonisht të madhe, për të kujtuar se rrënjët tona nisin
në traditën e gjallë të fesë. Pjetri e Pali, shkëmbi e drita e kumtimit, këta dishepuj
të Krishtit ‘kaq të ndryshëm’ – siç thotë Papa – padyshim në kuptimin se plotësojnë
njëri-tjetrin – vijojnë t’i tërheqin sytë tonë e hapat tonë drejt Romës ‘ad Limina
Apostolorum” (tek Varret e Apostujve). Ata mbeten të gjallë mes nesh, për ta drejtuar
e për ta ndezur fenë tonë e për t’i hapur udhën drejt kufijve të botës”.