Vdiq At Pasquale Borgomeo, për 20 vjet drejtor i Radio Vatikanit.
(03.7.2009 RV)Dje pas dite pushoi së rrahuri zemra e At Pasquale Borgomeos,
Jezuit, drejtor i përgjithshëm i Radio Vatikanit për mëse 20 vjet. Mesha e dritës
e salikimit do të kremtohen nesër, 4 korrik në ora 9.15 në Kishën e Shpirtit Shenjt
në Sassia në Romë. E tërë familja e Radio Vatikanit i shpreh familjes së atë Borgomeos
e Shoqërisë së Jezusit (Jezuitëve) afërsinë shpirtërore në lutje e ngushëllimet më
të thella. Atë Pasquale Borgomeo ishte 76 vjeçar, prej të cilave 60 i kaloi në
Shoqërinë e Jezusit (Jezuitë). Prej këtyre, 35 i kaloi në shërbim të Papës e Selisë
së Shenjtë në Radio Vatikan, së pari si Përgjegjës i Redaksisë Qendrore, më pas si
Drejtor i Programeve e së fundi si Drejtor i Përgjithshëm. I lindur në Napoli,
njeri i hapur, i përzemërt e komunikues, i specializuar në teologjinë patristike me
tezën e doktoraturës mbi Shën Agostinin në Sorbonë të Parisit nën udhëheqjen e të
madhit Henri Irené Marrou, Atë Borgomeo e vuri tërë inteligjencën e shkëlqyeshme,
kulturën e gjerë e zotërimin e shkëlqyeshëm të gjuhëve në botën e komunikimeve shoqërore.
U impenjua shumë që Radio Vatikani të ishte e pranishme në mënyrë aktive e të
përshtatshme jo vetëm në botën katolike, por edhe në botën e gazetarëve e në organizatat
ndërkombëtare të radiofonisë. Disa herë ka vizituar edhe Shqipërinë e Radio Televizionin
Shqiptar duke dhënë ndihmën e tij të pakursyer me zemër e mjete radiofonike. Organizator
i jashtëzakonshëm, e ka udhëhequr e drejtuar me entuziazëm bashkësinë e madhe të Radio
Vatikanit duke lënë një trashëgimi të çmueshme bindjeje e përkushtim në shërbimin
kishtar të pasardhësit të Pjetrit, e në kumtimin e Ungjillit përmes fjalës së transmetuar
e të përhapur me mjetet më të azhurnuara të teknikës moderne.