Ի Տէր հանգչեցաւ Ներսէս արքեպիսկոպոս Պոզապալեան

Ի Տէր հանգչեցաւ Ներսէս արքեպիսկոպոս Պոզապալեան



Շաբաթ 27 Յունիս 2009-ի առաւօտեան, Նայիրի բժշկական կենդրոնին մէջ, 72 տարեկանին իր մահկանացուն կնքեց Մայր Աթոռ Սուրբ Էջմիածնի երիցագոյն միաբաններէն՝ Հայ Առաքելական Եկեղեցւոյ նուիրեալ և բազմավաստակ սպասաւոր՝ Գերշ.Տ Ներսէս արք. Պոզապալեան։

Սրբազանը 18 Փետրուար 2009-ին, Մայր Աթոռ Սուրբ Էջմիածնի միաբանական իր կացարանին մէջ, իրեն ծանօթ անձնաւորութեան կողմէ, կողոպուտի նպատակով՝ յարձակումի ենթարկուած էր , որու հետևանքով ծանրօրէն վնասուած՝ և անգիտակից վիճակի մէջ հիւանդանոց փոխադրուած էր ։ Միջադէպքէն մինչեւ իր վախճանը, Տ Ներսէս Արք. Պոզապալեան յանձնուած էր Երևանի Նայիրի բժշկական կենտրոնին մէջ, բժիշկներու հոգատար խնամքին։

Սրբազանին մահը մեծ կորուստ է Հայաստանեայց Առաքելական Եկեղեցւոյ և հաւատացեալներուն համար։

Գարեգին Բ Ամենայն Հայոց Կաթողիկոսը, Գերագոյն Հոգևոր Խորհուրդը և Հայ Եկեղեցւոյ հոգևորականաց դասը, աղօթարար սրտով կը սգան Սրբազանին մահը։

Հանգուցեալ Սրբազանին աճիւնը երկուշաբթի՝ 29 Յունիս 2009-ի ժամը 17-ին, պիտի դրուի Ս Գայանէի նուիրուած վանքին մէջ, վերջին հրաժեշտի համար, ժամը 19-ին պիտի կատարուի հոգեհանգստեան արարողութիւնը։ Իսկ Երեքշաբթի՝ 30 Յունիսին, ժամը 11-ին Թեղենիքի իր իսկ կառուցած՝ Սրբոց Նահատակաց եկեղեցւոյ մէջ (Կոտայքի մարզ) պիտի մատուցուի Ս Պատարագ, որուն ընթացքին պիտի կատարուի վերջին օծման և թաղման կարգը։

Յաւարտ Ս Պատարագին` եկեղեցւոյ բակին մէջ տեղի պիտի ունենայ Սրբազանին յուղարկաւորութեան արարողութիւնը։

Յիշատակն արդարոյն օրհնութեամբ եղիցի։

Ռատովատիկանի հայերէն հաղորդումներու անձնակազմը իր խոր ցաւը կը յայտնէ Սրբազանին մահուան համար ու իր ցաւակցութիւնները կ՝արտայայտէ Ամենայն Հայոց Գարեգին Բ. կաթողիկոսին, ողբացեալին միաբանակիցներուն ու նաեւ ընտանեկան պարագաներուն եւ հարազատներուն։