Адноўлены крыж Еўфрасінні Полацкай павінен прыбыць у Менск 26 ці 27 чэрвеня
Адноўлены крыж Ефрасінні Полацкай, які нясуць удзельнікі хрэснага ходу па прыгранічных
раёнах Беларусі, 26 ці 27 чэрвеня павінен прыбыць у Мінск. Хрэсны ход па прыгранічных
раёнах пачаўся 14 чэрвеня. Гэтую акцыю Дзяржаўны пагранкамітэт прымеркаваў да 65-годдзя
вызвалення Беларусі ад нямецка-фашысцкіх захопнікаў, Дню памяці ахвяраў Вялікай Айчыннай
вайны і 25-годдзю заснавання Сабора беларускіх святых. Як паведаміў БелаПАН святар
Полацкай епархіі Аляксандр Шаховіч, у хрэсным ходзе бяруць удзел ваеннаслужачыя і
звычайныя грамадзяне. Нейкую частку шляху крыж нясуць на руках, недзе — вязуць на
машыне або перапраўляюць на верталёце. Паводле яго слоў, за захаванасць крыжа адказваюць
ваеннаслужачыя, якія "з вялікай адказнасцю ставяцца да гэтага". Цяпер хрэсны ход
прыбыў у Смаргонскі пагранічны атрад у Гродзенскай вобласці. Дагэтуль ён пабываў у
Верхнядзвінску, мястэчку Опса Браслаўскага раёна, Паставах, вёсцы Гудагай Астравецкага
раёна, Ашмянах. Пасля Смаргоні хрэсны ход пройдзе праз Ліду, Гродна, Мінск, Брэст,
Пінск і Гомель. "Па шляху крыжа ў храмах праходзяць малебны, і да святыні могуць прыкласціся
ўсе, хто пажадае", — зазначыў святар. Варта зазначыць, што копія крыжа Ефрасінні
Полацкай, створаная беларускім мастаком Мікалаем Кузьмічом, упершыню пакінула Спаса-Праабражэнскі
сабор полацкага Спаса-Ефрасіннеўскага жаночага манастыра. Крыж Ефрасінні Полацкай
— унікальны твор старабеларускага эмальернага мастацтва, помнік пісьменства XII стагоддзя.
Выраблены ў 1161 годзе полацкім ювелірам Лазарам Богшам на замову прападобнай Ефрасінні,
ігуменні Полацкай, як каўчэг для захавання хрысціянскіх рэліквій. Шасціканцовы
крыж вышынёй 51,8 см быў выкананы з кіпарысавага дрэва, зверху і знізу пакрыты 21
залатой пласцінкай з каштоўнымі камянямі, арнаментам і 20 сярэбранымі пазалочанымі
пласцінкамі. На верхніх канцах крыжа — выявы Ісуса Хрыста, Божай Маці, Іаана Прадцечы.
У цэнтры ніжняга перакрыжавання — чатыры евангелісты, на канцах — архангелы Міхаіл
і Гаўрыіл. Унізе — нябесныя заступнікі Ефрасінні Полацкай і яе бацькоў: святая Ефрасіння
Александрыйская, святы велікамучанік Георгій і святая Сафія. На адваротным баку крыжа
— абразы святога Іаана Златавуста, святога Васіля Вялікага, святога Рыгора Назіянзіна
(Багаслова), апосталаў Пятра і Паўла, святога Стэфана, святога Дзімітрыя, святога
Панцеляймона. Над кожным абразком часткова грэчаскімі, часткова славянскімі літарамі
зроблены надпісы.