Protesta të reja në Iran. Policia qëllon kundër manifestuesve.
(24.06.2009 RV)Rritet tensioni në Iran dhe keqësohen marrëdhëniet e Teheranit
me bashkësinë ndërkombëtare. Pas protestave të këtyre ditëve, që shkaktuan 17 viktima,
Ministria e Brendshme nuk lejoi sot manifestimet përkujtimore për të vrarët. Megjithatë,
rreth 5 mijë vetë u përleshën me policinë dhe me paraushtarakët në sheshin e parlamentit.
Policia qëlloi kundër manifestuesve. Qeveritarët akuzojnë persona me pasaportë
britanike për përfshirje në përleshjet e përgjakshme. Fajtor, sipas regjimit të Ahmadinexhadit,
është edhe shërbimi sekret amerikan. Irani njofton se nuk do të marrë pjesë në mbledhjen
e nesërme të ministrave të jashtëm të G8-ës, që do të zhvillohet në Trieste të Italisë,
duke e thelluar ndarjen me Perëndimin. Gjatë një konference për shtyp, presidenti
amerikan Obama theksoi se pa vëzhgues ndërkombëtarë nuk mund të dihet ekzaktësisht
se ç’ka ndodhur në qendrat e votimit, por nëse një përqindje e madhe e popullit iranian
i konsideron zgjedhjet të paligjshme, lindin dyshime të mëdha mbi transparencën e
votimeve. Kreu i opozitës, Mir Husein Musavì vazhdon të akuzojë përkrahësit e
Ahmadinexhadit për manipulim të zgjedhjeve, por shtypja e protestave me gjak duket
se po jep rezultatet e para. Kandidati konservator Mosen Rezai tërhoqi padinë për
parregullsi në numërimin e votave, pavarësisht se kritikoi autoritetet për kohën e
paktë të lënë në dispozicion lidhur me verifikimet. Sipas lajmeve që vijnë nga interneti,
të gjitha spitalet e ambasadat janë rrethuar nga milicët. Përkrahësit e presidentit
aktual, Ahmadinexhad, kanë zhvilluar protesta para ambasadës britanike, pas përjashtimit
nga Londra të dy diplomatëve iranianë, si përgjigje e përjashtimit nga Teherani të
dy diplomatëve britanikë.