23 чэрвеня 2009 году Апостальскі Візітатар для грэка-католікаў Беларусі Архімандрыт
Сяргей (Гаек) адзначае 35-годдзе свайго сьвятарства. Сёлета таксама ў яго 60-гадовы
юбілей. Архімандрыт Сяргей (Гаек) – доктар багаслоўя, доктар Усходніх царкоўных
навук, член-карэспандэнт Папскай Міжнароднай Марыйнай Акдэміі (Pontificia Academia
Mariana Internationalis), дасьледчык духоўнасьці і літургіі Ўсходніх Цэркваў, а таксама
аўтар шматлікіх навуковых публікацыяў па літургіцы, марыялогіі, еўхарысталогіі, кірыла-мятодаўскай
традыцыі і экуменічных стасунках Цэркваў на славянскім Усходзе.
Айцец Сяргей
(сьвецкае імя – Ян) нарадзіўся 08.02.1949 г. у Лышкавіцах Лодзкага ваяводзтва (Польшча). Напачатку
хацеў вывучаць славянскую філалогію ў Варшаўскім універсітэце, аднак адмовіўся ад
гэтай ідэі і ў жніўні 1967 г. уступіў у манастыр айцоў-марыянаў, дзе змог рэалізаваць
сваё жаданьне служыць для Ўсходніх Цэркваў. Дзякуючы беларускаму сьвятару-марыяніну
Тамашу Падзяву, які меў моцны інтэлектуальны і духоўны ўплыў на яго, далучыўся да
беларушчыны.
У 1967-1974 гг. навучаўся на багаслоўскім факультэце Каталіцкага
ўніверсітэту ў Любліне (КУЛ). Падчас студыяў кантактаваў з беларускім культурным і
рэлігійным асяродкам у Лондане (найперш з біскупам-марыянінам Чэславам Сіповічам).
У гэтым часе быў перасьледаваны службамі бясьпекі Польскай Народнай Рэспублікі.
Вечныя
манаскія зарокі склаў 15.08.1973 г. Сьвятарскія сьвячаньні атрымаў 23.06.1974 г. у
Гуры Кальварыі каля Варшавы.
У 1978-1983 гг. ён студыяваў у Папскім Усходнім
інстытуце (Pontificia Instituto Orientale), а ў лістападзе 1983 г. абараніў доктарскую
працу. У 1983-1999 гг. вёў навукова-дыдактычную дзейнасьць пры катэдры праваслаўнага
багаслоўя ў Экуменічным інстытуце Каталіцкага ўніверсітэту ў Любліне, быў прафесарам.
З
восені 1993 г. айцец Сяргей Гаек - дэлегат-візітатар Кангрэгацыі Ўсходніх Цэркваў
у справе грэка-католікаў Беларусі, а ў студзені 1994 г. Папа Ян Павел ІІ прызначыў
яго Апостальскім Візітатарам для грэка-католікаў у Беларусі.
У 1996 годзе а.
Сяргей атрымаў годнасьць архімандрыта, а з 1997-ым стаў кансультарам Кангрэгацыі Ўсходніх
Цэркваў.
У лютым 2003 г. падчас візіту каталіцкіх ярархаў Беларусі ad limina
Apostolorum Папа Ян Павел II падарыў Архімандрыту Сяргею (Гаеку) біскупскі крыж, а
ў 2004 г. Першаярарх УГКЦ кардынал Любамір Гузар дараваў яму грамату на права нашэньня
панагіі і даў літургічны прывілей на бласлаўленьне вернікаў дыкірыем і трыкірыем.