Një delegacion i Patrikut Bartolomeu I do të vijë në Romë për festën e Shën Pjetrit
e të Shën Palit
(23.06.2009 RV)Për festën e Shën Pjetrit e të Shën Palit, e cila bie më 29
qershor, Patriku Ekumenik Bartolomeu I do të dërgojë, siç është tashmë traditë, një
delegacion në Romë, në përgjigje të atij të dërguar nga Papa Benedikti XVI në Fanar
për festën e Shën Andresë, vëllait të Shën Pjetrit e pajtor i Kishës së Kostandinopojës.
Ky shkëmbim delegacionesh ndërmjet Romës e Kostandinopojës – kujton sot një notë e
Këshillit Papnor për nxitjen e bashkimit të të krishterëve – ka filluar me vizitën
e presidentit të Sekretariatit të atëhershëm për bashkimin e të krishterëve, kardinalit
Johanes Vilebrands, në vitin 1969. Këtë vit, delegacioni i Patrikut Bartolomeu
I udhëhiqet nga Mitropoliti i Francës Emanuel, drejtor i Zyrës së Kishës ortodokse
pranë Bashkimit Evropian. Ai përbëhet nga ipeshkvi i Sinopit, Atenagoras, asistent
i Mitropolitit të Belgjikës dhe nga diakoni Joakim Bilis i Fanarit. Delegacioni do
të marrë pjesë në Lutjen Mbrëmësore të 28 qershorit, e cila do të kryesohet nga Benedikti
XVI në Bazilikën e Shën Palit jashtë mureve të Romës, duke filluar kështu ditën përfundimtare
të Vitit Paolin, kremtuar në 2000 vjetorin e lindjes së Apostullit të Popujve. Më
29 qershor, delegacioni do të marrë pjesë në Meshën e Papës në Vatikan, do të pritet
në ditët e mëpasme prej Atit të Shenjtë dhe do të ketë takime me personalitete të
Këshillit Papnor për nxitjen e Bashkimit të të krishterëve.