Benedikti XVI kujton Alçide De Gasperin: model i fesë e i vetëdijes morale për ata
që udhëheqin Italinë.
(20.06.2009 RV)Ndershmëria, feja
e çeliktë e autonomia në vendimet politike: këto janë cilësitë, që do ta nderonin
çdo burrë të krishterë shteti, cilësi që De Gasperi i mishëroi plotësisht. Këtë theksoi
sot Benedikti XVI, duke pritur në audiencë, në Sallën e Papëve në Vatikan, anëtarët
e Fondacionit kushtuar Birit të shquar të Italisë, që ndërroi jetë më 19 gusht, 55
vjet më parë, duke shqiptuar tri herë me radhë, me një fije zëri, emrin e Jezusit.
Benedikti XVI e kujtoi si njeri me vlera të krishtera, që e frymëzuan gjithnjë
veprimtarinë e tij politike, por që nuk i shpalosi kurrë si flamur për qëllime propagandistike,
përkundrazi, për një orientim të kthjelltë shpirtëror, të cilit do t’i qëndronte besnik
deri në fund të fundit. Duke kujtuar jetëshkrimin e De Gasperit, Papa theksoi se ishte
ai që e mbrojti lirinë e demokracinë në Itali e që udhëhoqi rindërtimin e një vendi,
i cili linte pas shpine fashizmin e gërmadhat e konfliktit të dytë botëror: “I
formuar në shkollën e Ungjillit, De Gasperi qe i aftë ta shprehte me akte konkrete
e koherente fenë që praktikonte. Përshpirtëria e politika ishin dy permasat karakteristike
të personalitetit të tij e të impenjimit të tij shoqëror e shpirtëror”.
Kryeministri i parë i Republikës italiane, që gjeti kohë për t’u lutur e për t’u
lidhur me Zotin edhe në çastet më të ndërlikuara të jetës së tij, nderoi kështu Kishën
e Italinë, duke u bërë shembull për të gjithë burrat e shtetit me besnikërinë me tij
ndaj vlerave njerëzore e kristiane. Me vetëdijen morale, që i priu në të gjitha rrugët
e thepta të politikës, nëpër të cilat u përshkua, diti të lidhë ngushtë fenë me politikën,
pa e humbur asnjëherë pavarësinë, kur ishte fjala për të marrë vendime të rëndësishme
për fatet e Italisë. Kështu, në mbarim të ditëve të jetës, mundi të thoshte “Bëra
gjithçka ishte në dorën time, ndërgjegjja ime është në paqe!” dhe “Politikani
shikon votimet e ardhshme, burri i shtetit, breznitë e ardhshme”. Kujtojmë
se Alçide De Gasperi (Pieve, 3 prill 1881- Borgo Valsugana, 19 gusht 1954) është politikan
italian, më parë anëtar i Partisë Popullore, më pas, themelues i Demokracisë Kristiane,
me shkrimin e njohur “Le idee ricostruttive della Democrazia Cristiana”.Ishte edhe kryeministri i parë i Republikës italiane, një ndër etërit e Republikës
e etërit themelues të Bashkimit Evropian, së bashku me francezin Robert Shuman dhe
gjermanin Konrad Adenauer.