“Përçimi i fesë tek fëmijët”: një libër i dobishëm
(16.06.2009 RV)“Përçimi i fesë
tek fëmijët”: ky është titulli i librit të gazetarit italian Fabio Narçizi, anëtar
i Equipe Notre Dame (END), lëvizje botërore mbi përshpirtërinë e çiftit. I botuar
nga paolinet, vëllimi paraqet përvojën 12-vjeçare të një famullie romake. Se cila
është mënyra më e frytshme për t’u përçuar fenë të vegjëlve, na e shpjegon në mikrofonin
tonë vetë autori: Para së gjithash, feja komunikohet në familje e bëhet që
në fillim, që kur fëmija lind e është akoma në djep. Ai e kupton afërsinë e prindërve
në një mënyrë, që libri përpiqet ta shpjegojë, mënyrë që do ta ndihmojë më vonë të
zbulojë Zotin. Janë të rëndësishme sidomos shenjat: shenja e kryqit mbi ballë kur
zgjohet në mëngjes, në mbrëmje kur shkon të flejë. Është diçka e ndryshme nga përkëdheljet,
sepse shoqërohet me një bekim, sepse foshnja dëgjon zërin e prindërve, që ndryshon
e dalëngadalë zbulon në atë shenjë e në ato fjalë një Atë, që është i tij por edhe
i të gjithëve, Atin Qiellor. Në libër paraqitet një punë kërkimore. Cilat
janë rezultatet që dalin prej saj? Ajo që ka ndryshuar e që ka gjithnjë e më
pak rëndësi është ambienti i jashtëm, i cili dikur kishte shenja të dukshme e të mëdha
feje. Është pakësuar edhe funksioni edukativ i familjes. Që nga vitet ’70, familja
ia ka deleguar gjithnjë e më shumë famullisë apo shkollave katolike edukimin fetar
të fëmijëve. Sot kemi fëmijë që arrijnë në Kungimin e Parë, pra në moshën 8 vjeç pa
ditur si bëhet shenja e kryqit. Ky është element shumë shqetësues, pasi do të thotë
se në vitet e mëparshme edukimi fetar ka munguar krejtësisht.