13 чэрвеня 2009 г. у мінскай архікатэдры адбылася сустрэча Мітрапаліта Мінска-Магілёўскага
арцыбіскупа Тадэвуша Кандрусевіча з моладдзю, якая сёлета прымала ўдзел у малітоўнай
сустрэчы ў Вільнюсе, арганізаванай братамі з экуменічнай супольнасці Тэзэ.
Мітрапаліт
у сваім звароце да моладзі акрэсліў праблемы сучаснага свету ў катэгорыях слабой веры
або яе поўнай адсутнасці.
«Менавіта вера з’яўляецца гарантам таго, што
чалавек зможа адказаць на выклікі сучаснасці і не згубіць надзею, абароніць хрысціянскія
карані, не паддасца спакусе матэрыялізацыі жыцця ці маральнаму рэлятывізму, — падкрэсліў
арцыпастыр. — Сёння нанава паўстае шэкспіраўскае пытанне: „To be or not to be“ — „Быць
ці не быць“ хрысціянству. Хрысціянскія каштоўнасці трэба бараніць супольна з іншымі
хрысціянамі, асабліва з Праваслаўнай Царквой. Нашы пазіцыі адносна выклікаў сучаснасці
практычна аднолькавыя, таму наша сіла — у еднасці».