(15.06.2009 RV)Imzot Maksimin Martinéz Miranda, ipeshkëv i Çiudad Altamiranos,
në Shtetin e Guerreros, në Meksikë, konfirmoi vrasjen e një meshtari, atë Habakuk-Hernandez
Benítez dhe të dy seminaristëve, Eduardo Oregón Benítez dhe Silvestër Gonzáles Kambron
ndërsa udhëtonin në rrugët e qytetit me një kamionçinë, për të marrë pjesë në një
takim për punën baritore me thirrjet meshtarake. Sipas shtypit vendas, viktimat janë
qëlluar pas shpine me disa plumba, që ka mundësi të jenë nisur nga armët e bandave
të shitjes së drogës, gjatë një konflikti ndërmjet tyre. Por deri tani policia dhe
autoritetet e qytetit nuk kanë dhënë asnjë shpjegim të pranueshëm të fakteve. Kryeipeshkvi
i Akapulkos, imzot Felipe Aguirre Franko, pasi konfirmoi lajmin në një takim të shkurtër
me shtypin, hamendësoi se meshtari e seminaristët mund të jenë ndodhur rastësisht,
në mes të një ndeshjeje të bandave kriminale të drogës, të shpeshta në zonat e ndryshme
të Meksikës, ku edhe sundojnë të patrazuara. Duke u shprehur familjarëve të të vrarëve
solidaritetin dhe pjesëmarrjen në dhimbjen për humbjen e të dashurve, imzot Aguirre
Franko njoftoi se të katër dioqezat e provincës kishtare u mblodhën sot për të analizuar
situatën e rëndë në Shtetin e Guerreros e botuan edhe një komunikatë përfundimtare,
lidhur me ngjarjen e hidhur, duke kërkuar t’i jepet fund një herë e mirë dhunës, gjatë
së cilës qytetarët përdoren si mburoja në raste konfliktesh tejet të shpeshta, që
varen nga forca, të cilat qëndrojnë shumë më lart se qytetarët e thjeshtë e që dëshirojnë
të imponojnë në vend ‘ligjin e xhunglës”.