Impenjimi i Kishave anglofone në luftën kundër abuzimeve ndaj të miturve
(10.6.2009 RV)Të premten e kaluar
kryeipeshkvi i Dublinit, Diarmuid Martin dhe ai i Armagut, Shon Brejdi u takuan me
Papën Benedikti XVI dhe me gjashtë anëtarë të Kuries Romake për të diskutuar me ta
“Raportin Rajan”. Papa, deklaroi më pas imzot Martin, u prek dhe u shqetësua dukshëm
kur dëgjoi detajet e raportit, sidomos pjesën ku përshkruhen vuajtjet dhe abuzimet
mbi fëmijët. Shenjtëria e Tij theksoi se është koha për një shqyrtim të thellë të
jetës së Kishës në Irlandë, këshilloi që të nxirret në dritë çdo abuzim e të sigurohet
drejtësia për të gjithë. Kisha, nëse nga njëra anë, duhet të ndihmojë viktimat, nga
ana tjetër, duhet të punojë që këto ngjarje të mos përsëriten më. Shkandulli i
abuzimeve seksuale në Kishë është dënuar nga i gjithë katolicizmi. Dalja hapur e Vatikanit
dhe e Papës kundër problemit u dha guxim viktimave të denoncojnë akte të paditura
dhe Kishës të impenjohet më tej për t’u dhënë fund abuzimeve. Pikërisht mbi këtë argument
u fol pikërisht në Konferencën anglofone, e cila nga 1 deri më 5 qershor mblodhi në
Vatikan ipeshkvij, rregulltarë, rregulltare e laikë. Kjo temë u bë veçanërisht e rëndësishme
pas publikimit të një raporti qeveritar në Irlandë, në të cilin u vunë në dukje abuzimet
e kryera që nga vitet ’30 deri në vitet ’90 në shumë institute korrektimi, të financuara
nga shteti, por shpesh të administruara nga urdhëra rregulltare katolike. “Ky
takim – tha ipeshkvi i Rapid City, Bleiz Xhei. Kupish, kryetar i Komisionit për mbrojtjen
e fëmijëve dhe të rinjve në Konferencën Ipeshkvnore katolike të SHBA-ve – u dha pjesëmarrësve
mundësinë të konsultohen me përgjegjësit e Vatikanit, të takohen me ekspertë në fushën
e mbrojtjes së fëmijëve e të marrin përvojë nga konferencat e tjera ipeshkvnore.
Jemi të gjithë dakord se duhet një plan, ku të përfshihet parandalimi, mbështetja
dhe shërimi. Konferenca anglofone – nënvizoi imzot Kupish, sipas lajmeve të “Catholic
Neës Service” – ndihmon personat që punojnë për Kishën të gjejnë mënyrat për të krijuar
një ambient, në të cilin të kenë besim ata që kanë pësuar abuzime. Është një çështje
njerëzore, një problem njerëzor, megjithëse duke më shumë në vendet e gjuhës angleze,
ndoshta sepse komunikimi është më i zhvilluar dhe më i hapur”. Organizata që
grupon Kishat anglofone të impenjuara në luftën kundër fenomenit të abuzimeve quhet
“Zyra kombëtare për mbrojtjen e fëmijëve dhe të të rriturve të pambrojtur”dhe që nga
viti 2008 ka si seli Uashingtonin. Takimet, që kanë filluar në vitin 2000, mbahen
çdo vit. Këto ditë në Vatikan ishin të pranishëm përfaqësues nga vendet ku flitet
anglisht, por edhe nga Italia, Kili e Gana. Takimi, i organizuar nga Konferenca Ipeshkvnore
Skoceze, pati si titull “Të shohim përpara – Sfidat që na presin”. “Fakti pozitiv
– deklaroi kryeipeshkvi i Adelaides, Filip Eduard Uilson – është se viktimat dolën
në dritë dhe se në pranuam se abuzimet janë pjesë ë historisë sonë dhe se po bëjmë
ç’është e mundur për t’u bërë ballë pasojave e për të siguruar një mënyrë të re për
marrëdhëniet brenda Kishës”. Programet e Kishës në këtë drejtim po zhvillohen gjithnjë
e më tepër.