Benedikti XVI ipeshkvijve të Venezuelës: situata në vendin tuaj është e vështirë,
përballojeni të bashkuar, duke rrënjosur Ungjillin në popull.
(08.06.2009 RV)Ipeshkvijtë duhet
t’i kushtojnë një vëmendje të veçantë meshtarëve, për t’i ndihmuar që ta kryejnë me
vetëmohim shërbimin e t’i pranojnë edhe vërejtjet, kur është nevoja. Benedikti
XVI shqetësohet përsëri për barinjtë e tij, shqetësim që e shprehu edhe një herë sot,
në audiencën kolektive me ipeshkvijtë e Venezuelës, në përfundim të vizitës ‘ad Limina’. Para
se t’u drejtonte fjalën 40 prelatëve, mbledhur në Sallën e Konçistorit të Pallatit
Apostolik, Benedikti XVI ndoqi analizën e kryetarit të Konferencës ipeshkvnore, imzot
Santana Sekuera mbi situatën tejet të vështirë në vend: “El gobierno actual... Qeveria
aktuale, pa marrë parasysh Kushtetutën dhe opinionet që vijnë nga fusha të ndryshme
të vendit, po vë në jetë një projekt politik që quhet “Socializmi i shekullit XXI”,
me frymëzim të dukshëm marksist. Zbatimi i tij, në vijim e sipër, po e përçan ndjeshëm
popullsinë, duke krijuar kështu atmosferën e urrejtjes e të dhunës”. Benedikti
XVI u përgjigj duke u dhënë zemër ipeshkvijve e duke vlerësuar impenjimin e tyre për
ta përballuar këtë situatë, me mësimet e Ungjillit: “Aprecio vuestro empeño
por irradiar... I vlerësoj përpjekjet tuaja për të rrezatuar dritën
e Ungjillit mbi ngjarjet më të rëndësishme, që kanë të bëjnë me vendin tuaj, pa interesa
të tjera, përveç përhapjes së vlerave të vërteta kristiane, për të lehtësuar kështu
kërkimin e së mirës së përbashkët, të harmonisë e të stabilitetit shoqëror”. Më pas, duke nënvizuar nevojën e bashkëpunimit të ngushtë, afektiv e efektiv,
ndërmjet barinjve të popullit të Zotit, Papa i porositi ipeshkvijtë të kujdesen në
mënyrë të posaçme për meshtarët e tyre. Ata, bashkëpunëtorë të ngushtë të shërbimit
ipeshkvnor – shtoi Benedikti XVI – duhet të jenë në qendër të vëmendjes suaj e të
trajtohen me ngrohtësi e miqësi vëllazërore. Kjo do t’i ndihmojë – përfundoi Ati i
Shenjtë – ta kryejnë me vetëmohim shërbimin meshtarak e, kur është nevoja, t’i pranojnë
edhe vërejtet, ashtu si biri pranon qortimet e atit, kur duhet të përmirësohet ose
të korrigjohet. Së fundi Papa Racinger i ftoi ipeshkvijtë t’i dyfishojnë përpjekjet
për të inkurajuar zellin baritor ndërmjet meshtarëve, posaçërisht gjatë këtij viti,
që është shpallur ‘Vit Meshtarak’.