Obama në fjalimin nga Universiteti i Kajros propozon fillimin e ri të marrëdhënieve
me botën myslimane.
(04.06.2009 RV)Gjatë vizitës së tij në Lindje të Mesme, që synon afrimin e
SHBA me vendet myslimane si edhe uljen e tensioneve ndërmjet perëndimit dhe vendeve
me shumicë myslimane, presidenti amerikan Obama, mbajti sot paradite një fjalim të
rëndesishëm në Universitetin e teologjisë islamike Al -Azhar të Kajros. Fjalimi i
Obamës është një ndërhyrje shumë domethënëse si në marrëdhëniet e SHBA-së me botën
islamike, si dhe në perspektivën e paqes ndërkombëtare. Shtëpia e Bardhë njoftoi
se presidenti kishte disa muaj që përgatitej për këtë fjalim dhe se për të ishte këshilluar
edhe me disa eksponentë myslimanë të Amerikës dhe të vendeve të tjera. “Kam ardhur
këtu të kërkoj një fillim të ri për marrëdhëniet ndërmjet SHBA dhe myslimanëve kudo
nëpër botë, e para të bazuar tek interesi dhe respekti i ndërsjellë, dhe e dyta të
bazuar tek një e vërtetë, që është se Amerika dhe Islami nuk e përjashtojnë njëri-tjetrin
e nuk kanë nevojë të jenë në garë me njëri-tjetrin. Përkundrazi ata kanë pika të përbashkëta
dhe bashkëndajnë parime të përbashkëta si drejtësia dhe progresi, toleranca dhe dinjiteti
i të gjitha krijesave njerëzore” tha ndër të tjera presidenti Obama duke folur përpara
studentëve të universitetit të Kajros. Gjatë fjalës së tij presidenti amerikan
foli për probleme të mprehta si: -lufta në Irak dhe në Afganistan; -marrëdhëniet
me Izraelin dhe Palestinezët, për të cilët propozoi formulën dy kombe - dy shtete;
-përgjegjësitë që kanë kombet për armët bërthamore; a është e drejtë që sistemi demokratik
t’u imponohet të tjerëve; -liria fetare; -të drejtat e gruas si edhe tema
të lidhura me zhvillimin ekonomik dhe premisat për të. Takimi i Obamës me kolegun
egjiptian Hosni Mubarak qe etapa e parë e takimeve me udhëheqësit e vendeve të Lindjes
që i parapriu takimit me studentët e Kajros. Po sot u bë e ditur se udhëheqësi
suprem i revolucionit iranian Ali Khamenei deklaroi se vendet e këtij rajoni i urrejnë
thellësisht Shtetet e Bashkuara të Amerikës.