Thirrje e “Nismës së krishterë për Evropën”: merrni pjesë në zgjedhjet e ardhshme.
(03.06.2009 RV)Prag zgjedhjesh
evropiane në Vendet e Ulta dhe në Britaninë e Madhe. Votimet, që do të përfundojnë
të dielën, më 7 qershor, do të rinovojnë parlamentin e Strasburgut. 375 milion zgjedhës
do të caktojnë 736 deputetët e 5 viteve të ardhshme. Me këtë rast, Nisma e krishterë
për Evropën (Ixe), një grupim shoqatash e lëvizjesh nga 13 vende evropiane, u ka bërë
thirrje të krishterëve të marrin pjesë masivisht në votime. Është për t’u shënuar,
se gjatë viteve të kaluara, evropianët i kanë braktisur gjithnjë e më shumë kutitë
e votimit për Bashkimin Evropian, duke treguar se nuk kanë fort besim në institucionet
e Brukselit. Si mund të ringjallet interesi për këto institucione? Të dëgjojmë Luka
Jahir, përgjegjës ndërkombëtar i ACLI-it, Shoqatës së punëtorëve katolikë italianë,
anëtare e Nismës: Duhet të dilet nga rrethi i veçantë personal, të kuptohet
se jemi pjesë e një bote më të ndërlikuar, për të cilën duhet të informohemi e në
të cilën duhet të marrim pjesë. Duhet të pranojmë se përmasa evropiane është sot thelbësore
për jetën konkrete të familjeve, të ndërmarrjeve, të bashkësive tona. 70-80% e ligjeve
kombëtare, tashmë janë drejtpërdrejt të lidhura me ligjet evropiane, janë zbatim i
tyre. Pastaj, duhet të vendosim të luajmë një rol aktiv, e sidomos, ta shprehim mendimin
tonë përmes votës, duke zgjedhur kandidatë, që kanë treguar se punojnë seriozisht
për të mirën e përbashkët të Evropës.