Imzot Zimovski në Asamblenë Botërore të Shëndetësisë: urgjent një “kod etik i përbashkët”.
(03.06.2009 RV)Sektori i shëndetësisë
nuk është jashtë abuzimeve dhe padrejtësive. E dinë mirë vendet më të varfëra, që
duhet t’i bëjnë llogaritë me qeveri, pa mjetet e nevojshme për të përballuar deficitin
në fushën e shëndetësisë e me ndihma humanitare gjithnjë e më të pakta. Natyrisht,
jemi në një krizë globale, por edhe llogjika afariste bën që të mos hiqet dorë nga
fitimi edhe aty ku mbretëron mjerimi. Denoncimi i fuqishëm i kësaj gjendjeje u bë
gjatë Asamblesë së 62-të botërore të shëndetësisë në Gjenevë, nga kreu i delegacionit
të Vatikanit, imzot Zigmund Zimovski, aktualisht, president i Këshillit Papnor për
baritorinë e shëndetit. Gjendja aktuale ndikon sidomos në shëndetin e fëmijëve, të
cilët në shumë vende të botës nuk arrijnë të japin njëlloj si perëndimorët kontributin
e tyre në shoqëri, për shkak të ndryshimeve të mëdha pikërisht në fushën e shëndetësisë.
Është i nevojshëm, theksoi kryeipeshkvi Zimovski, një kod etik i përbashkët, normat
e të cilit të mos jenë thjesht konvencionale, por të rrënjosen në ligjin natyror,
të shkruar nga Krijuesi në ndërgjegjen e çdo njeriu. Drejtësia, përfundoi prelati,
nuk mund të arrihet vetëm me modele të mira ekonomike, megjithëse edhe këto janë të
nevojshme.