(03.06.2009 RV)Presidenti amerikan
Barak Obama mbërriti sot në Riad të Arabisë Saudite për një vizitë në Lindjen e Mesme,
e cila do të arrijë pikën kulmore nesër në Kairo të Egjiptit. Aty, Obama do t’i flasë
botës myslimane. Pikërisht para këtij fjalimi të rëndësishëm, sot kreu i terrorizmit
botëror, Osama bin Laden ngre zërin kundër presidentit amerikan, në një mesazh audio
të transmetuar nga televizioni arab Al-Zhazira. “Obama ndjek linjën e paraardhësit(Bush)
në përbuzjen e në frymën e hakmarrjes kundër myslimanëve”, pohon zëri, që mendohet
se është i Osama bin Ladenit. Pastaj vazhdojnë akuza të tjera. Bin Laden i referohet
ofensivës ushtarake pakistaneze në Luginën e Suatit dhe e akuzon Obamën se ka shkaktuar
emigrimin e një milion myslimanëve nga zona. Si presidenti amerikan, ashtu edhe ai
pakistanez janë fajtorë, sipas liderit të terrorit, sepse nuk e kanë lejuar popullsinë
të zbatojë ligjin e sharisë, duke shkatërruar e bombarduar vendin. Presidenti pakistanez
Zardari akuzohet hapur si tradhtar, në shërbim të amerikanëve. Ndërkaq, Barak
Obama është takuar me mbretin Abdullah të Arabisë Saudite, me të cilin ka folur për
procesin e paqes në Lindjen e Mesme, mbi çështjen e Iranit, krizën financiare botërore
dhe çmimin e naftës.