Tema dhe aspirata të Vitit Meshtarak, shpjeguar nga sekretari i Kongregatës për klerin,
imzot Mauro Piaçenca
(02.06.2009 RV)Meshtarët janë të
rëndësishëm jo për çka bëjnë, por për çka janë e populli i besimtarëve dëshiron t’i
shikojë, në punën e tyre apostolike, “të lumtur, të shenjtë e të gëzuar”. Fraza është
e kardinalit Klaudio Hjums, prefekt i Kongregatës për Klerin, i cili e ka shkruar
në letrën, që u dërgoi disa ditë më parë rreth 400 mijë priftërinjve. Në më pak se
dy javë, ata do të kremtojnë, sëbashku me Papën Benedikti XVI, fillimin e Vitit kushtuar
meshtarëve. Sekretari i dikasterit vatikanas, kryeipeshkvi Mauro Piaçenca shpjegon
në mikrofonin tonë, cilat janë temat dhe aspiratat e këtij viti. Ta dëgjojmë: Ati
i Shenjtë e ka shumë për zemër, siç është e natyrshme, jetën, përshpirtërinë, shenjtërimin
dhe misionin e meshtarëve. Vetë asambleja e përgjithshme e Kongregatës për Klerin,
në audiencën gjatë së cilës u shpall Viti meshtarak, kishte një titull mjaft domethënës:
“Identiteti misionar i meshtarit në Kishë, si përmasë përbërëse e ushtrimit të “tria
munera”(tri detyrave të meshtarit: predikimi, shenjtërimi dhe udhëheqja e popullit
të Zotit). Prandaj, është urgjente dhe e nevojshme në kohën tonë, të përmenden me
besnikëri si për meshtarët, ashtu edhe për popullin e Zotit, bukuria, rëndësia, domosdoshmëria
e shërbimit meshtarak të Kishës për shëlbimin e shpirtërave. Ja pra, pse Papa shpalli
një vit, që i kushtohet thellimit e rizbulimit të meshtarisë katolike. Lutja për e
me meshtarët nuk mund të mos i bëjë mirë krejt misionit të Kishës, që lidhet me identitetin
e me veprimtarinë e klerit. Do të kemi laikë dhe ipeshkvij të mirë, vetëm nëse do
të kemi meshtarë të mirë. Ja pse të gjithë janë të përfshirë njëfarësoj. Imzot
Piaçenca, cili është imazhi i meshtarit që u propozon Papa njerëzve të sotëm gjatë
këtij Viti? Imazhin e përhershëm – e nuk mund të mos jetë kështu! Është ai,
që Kisha e doktrina e pastër e kanë propozuar gjithnjë, e që sintetizohet mrekullisht
me figurën ungjillore të Bariut të Mirë: ja ky është imazhi. Fatkeqësisht koha jonë,
me ndryshime të mëdha ndërmjet Perëndimit të shekullarizuar dhe relativist dhe anëve
të tjera të botës, ku sensi i sakralitetit është akoma shumë i fortë, përjeton disa
tundime, që prekin edhe shërbimin meshtarak e që, me ndihmën e këtij Viti, është e
nevojshme të korregjohen. Po mendoj për shembull, për tundimin e aktivizmit, karakteristikë
jo e pak meshtarëve, të cilët megjithëse shumë bujarë, jo rrallë vënë në rrezik thirrjen
e tyre, nëse nuk qëndrojnë të lidhur me atë marrëdhënie jetësore me Krishtin që ushqehet
me heshtje, me lutje, me leximin e Fjalës së Hyjit, sidomos me kremtimin e devotshëm
të meshës së përditshme e me hapësira për adhurimin e Eukaristisë. Në këtë
botë gjithnjë e më të shekullarizuar dhe individualiste, meshtari, si mund të bëhet
shenjë kundërshtie, si të dëshmojë vlerat që nuk vdesin? Do të thosha, duke
u bërë dëshmitar i Absolutit, në mes të gjërave që ikin e shkojnë. Kontradikta e vërtetë
sot, nuk është më origjinaliteti i sipërfaqshëm, siç ka ndodhur në të kaluarën, që
ngjallte një interes të shkurtër e të vogël për faktet. Prandaj, është e kotë të bëhet
demagogji e të imitohen sjelljet e gjërat e kësaj bote. Meshtarët do të jenë shenjë
kundërshtie vetëm nësë bëhen shenjt e meshtarë të shenjtë. Të shohim Shën Gjon Maria
Vianejin, don Boskon, atë Masimilian Kolben, atë Pion nga Pietrelçina e kështu me
radhë. Si do të përjetohet ky Vit meshtarak? Viti meshtarak nuk do
t’u rezervohet vetëm meshtarëve, por krejt Kisha, në çdo komponente të saj, duhet
të rizbulojë madhështinë e dhuratës që Zoti deshi t’i japë me shërbimin meshtarak.
Edhe laikët duhet ta kuptojnë se me dhuratën e meshtarisë u lihet atyre freskia e
pranisë së Krishtit: jo kujtimi i Krishtit, por prania e tij aktuale. Të mendojmë
për zgjidhjen e mëkateve, për kremtimin e Meshës së Shenjtë, për predikimin e kështu
me radhë. Ja: në këtë drejtim shkon edhe titulli i zgjedhur nga Ati i Shenjtë për
këtë Vit: “Besnikëria e Krishtit, besnikëri e meshtarit”. Nuk është një ngjarje spektakolare,
por do të përjetohet si rinovim i brendshëm i identitetit meshtarak. Cilat
janë frytet që mund t’i japë Kishës ky Vit meshtarak? Menjëherë më vjen të
them “ato që do Zoti!” Do të jetë një vit për të rizbuluar bukurinë e rëndësinë e
meshtarisë, për të sensibilizuar për këtë krejt popullin e Zotit, të shuguruarit,
familjet, të vuajturit e sidomos të rinjtë. Kur shpalli Vitin meshtarak, Ati i Shenjtë
tha: “Urgjente duket edhe rifitimi i asaj vetëdije që i shtyn meshtarët të jenë të
pranishëm, të identifikueshëm e të njohur si për gjykimin me fe, si për virtytet personale,
ashtu edhe për veshjen, në fushat e kulturës e të bamirësisë, gjithnjë në zemër të
misionit të Kishës”. Prandaj, gjatë Vitit meshtarak do t’i lutemi Shpirtit të Shenjtë
edhe për këto fryte. Imzot Piaçenca, pse gjatë këtij Viti, do të publikohet
një doracak për rrëfyesit e për drejtuesit shpirtërorë? Është jashtë
çdo dyshimi se sakramenti i Pajtimit po kalon një krizë të thellë, që prej dhjetra
vjetësh. Duket se gjithnjë e më pak njerëz e ndjejnë ndryshimin e qartë ndërmjet së
mirës e së keqes, ndërmjet së vërtetës e gënjeshtrës, ndërmjet mëkatit e virtytit.
Nëse mendon se nuk ke bërë mëkat, vështirë t’i afrohesh rrëfyestores. Nga ana tjetër,
për shkak të mungesës së meshtarëve, por edhe për shkak të keqkuptimit të këtij veprimi
pastoral, nuk është gjithnjë e lehtë të gjesh meshtarë të gatshëm për të dëgjuar rrëfimet
e besimtarëve. Atëherë, ky doracak për rrëfuesit do të ndihmojë
në rizbulimin e bukurisë së sakramentit, nga i cili rrjedh dashuria e mëshirshme e
Zotit.