Papa në Mbretëreshën Qiellore: Kisha është korp i gjallë, që merr jetë nga Shpirti
Hyjnor.
(01.06.2009 RV)Solemnitet në Kishë:
mbarë bota e krishterë rijetoi dje atmosferën e Rrëshajëve. Benedikti XVI kryesoi
Meshën Shenjte në Bazilikën e Vatikanit për të kremtuar zbritjen e Shpirtit Shenjt
mbi Marinë e Apostujt, mbledhur në Çenakull. Pesëdhjetë ditë pas Pashkëve realizohet
premtimi, që Jezusi u pati bërë dishepujve: pagëzimi në Shpirtin Shenjt e ndikimi
nga lart i pushtetit, për t’ia kumtuar me forcë Ungjillin mbarë popujve. Me Rrëshajët
përmbushet plani i Hyjit për krijimin e një populli të ri e lind Kisha. Në homelinë
e Meshës, Papa u ndalua kryesisht tek figurat, me të cilat paraqitet Shpirti Shenjt:
figura e stuhisë dhe e zjarrit. Duke folur për stuhinë, që pastron ajrin, Ati i Shenjtë
theksoi: “Ç’ është ajri për jetën biologjike, është Shpirti Shenjt për jetën
shpirtërore; e ashtu si ekziston ndotja atmosferike, që helmon mjedisin e qeniet e
gjalla, ekziston edhe ndotja e zemrës dhe e shpirtit, që e helmon dhe e nxin jetën
shpirtërore”. Papa u ndalua, më pas, tek zjarri, figurë tjetër e Shpirtit
Shenjt, për të cilën na flasin Veprat e Apostujve: “Zjarrin e vërtetë,
Shpirtin Shenjt, e solli mbi tokë Jezu Krishti. Ai nuk ua rrëmbeu zotave, si bëri
Prometeu, sipas mitit grek, por u bë ndërmjetës i ‘dhuratës së Hyjit’, duke nxjerrë
për ne hirin e aktit më të madh të dashurisë: vdekjen e vet mbi kryq”. Më
pas, në lutjen e Mbretëreshës Qiellore, Benedikti XVI nënvizoi se Shpirti Shenjt,
që zbriti mbi Kishën në fasha, e bëri atë misionare dhe e nisi t’u kumtonte mbarë
popujve fitoren e dashurisë hyjnore mbi mëkatin.
Shpirti Shenjt është shpirti
i Kishës. Ç’do të ishte Kisha pa të? – pyeti Papa: “Do të ishte sigurisht
një lëvizje e madhe historike, një institucion i ndërlikuar e i fuqishëm shoqëror,
ndoshta një lloj agjensie humanitare: e në të vërtetë, kështu e mbajnë ata, që nuk
e shikojnë me syrin e fesë. Në realitet, në natyrën e saj të vërtetë e edhe në praninë
e saj të mirëfilltë historike, Kisha brumoset e udhëhiqet gjithnjë nga Shpirti i Zotit
të vet. Është një trup i gjallë, që merr jetë pikërisht nga Shpirti i padukshëm hyjnor”. Duke
kujtuar se sivjet Rrëshajët kremtoheshin në ditën e fundit të majit, në të cilën zakonisht
kremtohet festa e Pasisë së Zojës, Papa shpjegoi se Maria e re është ikonë mahnitëse
e Kishës, me rininë e saj të përhershme, që buron nga Shpirti Shenjt, e Kishës, misionare
e Fjalës së mishëruar. Pas lutjes së Mbretëreshës Qiellore, mendimi i Papës shkoi
përsëri në Abruco, ku një numër i madh të rinjsh vijojnë të mblidhen rreth Kryqit
të Ditëve Botërore të Rinisë, që po shtegton në viset tyre të kthyera në gërmadhë,
i mbartur nga një grup vullnetarësh: “Në bashkim me të rinjtë e ktyre trojeve,
të dëmtuara rëndë nga tërmeti, i lutemi Krishtit të vdekur e të ngjallur, të ndikojë
mbi ta Shpirtin e tij të ngushëllmit e të shpresës”.