Jordani, 9 maj: mbi gjurmët e tri feve monoteiste.
Mali Nebo Mali Nebo, 806 metra mbi nivelin e detit, lartohet mbi sheshinën
transjordanike, 25 kilometra në jugperëndim të Amanit. Ka mundësi që në lashtësi të
ketë qenë i lidhur me kultin e hyjnisë babiloneze Nebu. Me rëndësi historike dy majat,
Sijaga (shpatet perëndimore) e Mukajat (juglindje). Në brinjat e malit derdhen shumë
përrenj, ndërmjet të cilëve, Ujun Musà (Burimet e Moisiut), Ajn Kanisah (Burimi i
Kishës) etj. Majat, të rrahura nga era, i hapin syrit të udhëtarit një panoramë të
pashoqe të Tokës Shenjte e të Jordanisë jugore: në jug mund të soditen Deti i Vdekur
e Shkretëtira e Judesë; në lindje, Lugina e Jordanit, Malet e Judesë e të Samaraisë;
në veri, Jebel Oshà (Mali Osha) e Vadi Zerka (Lugina e kaltërt). Në sfondin e kodrinave
që rrethojnë Amanin, kur horizonti është i kthjellët, mund të shihen edhe Betlehemi,
fortesa e Herodit, Lugina e Jordanit, Deti i Vdekur, Oaza e Jerikos, kupolat e Jeruzalemit
e, natën, dritat e Qytetit Shenjt. Sipas traditës, është vendi prej nga Zoti i tregoi
Moisiut Tokën e premtuar, në përfundim të provës në shkretëtirë, 40 vjet pas Daljes
nga Egjipti. Memoriali i Moisiut mbi Malin Nebo u ndërtua nga të krishterët e zonës
së Madabasë për të kujtuar faqen e famshme të Biblës (Kapitulli 34 i Deuterenomit)
në të cilën tregohet fundi i jetës së Moisiut, Profet e Njeri i Zotit. Nga maja e
këtij ballkoni natyror, Moisiu e pa nga larg, me fe e shpresë, Tokën e premtuar. Mijëra
shtegtarë, që kanë shkelur mbi majën e Malit Nebo, kanë provuar se ky është vend
që shëron shpirtin e korpin, vend strehimi për të gjithë ata që vuajnë e kërkojnë
paqe.
Françeskanët në Sijaga mbi Malin Nebo Prania e françeskanëve
të Rojtarisë së Tokës Shenjte mbi Malin Nebo nis që në vitin 1932. U vendosën këtu
falë disa kushteve të favorshme: entuziazmit të fratit kroat Jerom Mihaiç (kujdestar
i kopshteve të Rojtarisë së Jerikos, mik e bamirës i familjeve endacake beduine, që
kishin ngritur çadrat në brigjet e Jordanit); lejes e bashkëpunimit të emirit Abdullah
Ben Hussein, i cili i autorizoi françeskanët të vendosen në Majën e Sijagasë, mbi
Malin Nebo; rizbulimit të rrugës së Egjerisë, dmth. rrugës që pati bërë kjo shtegtare
në viteve 393-396, përshkruar në ditarin e saj si dhe dëshmisë së ipeshkvit monofizit
të Gazës, Pjetër l’Ibero, që përshkruan zanafillën e mrekullueshme të Shenjtërores.
Studium Biblicum Franciscanum ka organizuar dy fushata gërmimesh, më 1933-1937
e pastaj më 1960, nën drejtimin e arkeologut françeskan me famë botërore, Atë Mikele
Piçirilo (1944-2008 ), që vdiq pak kohë më parë e u varros në kuvendin mbi Malin Nebo.
Gjatë gërmimeve, u zbuluan Bazilika e Moisiut Profet, manastiri Vadì Afrit (Lugina
e Djallit) dhe pesë Kisha (e Shën Gjergjit, Shën Lotit, Shën Prokopit, Shën Amos,
Shën Kaziseos dhe e Priftit Gjon) të gjitha me dysheme të mrekullueshme, realizuar
me teknikën e mozaikut, ndonëse gjysëm të rrënuara gjatë periudhës së ikonathyersve.
Bazilika e Moisiut u ngrit në shekullin IV, mbi themelet e një monumenti të mëparshëm
të epokës klasike. Aty ishte edhe një manastir, i zmadhuar në shekullin VI. Nga viti
1933 në Sijaga, mbi Malin Nebo, u ngrit një kuvend françeskan, me hapësira për lutje
e ndërtesa të posaçme për arkeologët. Si rezultat i këtij misioni, këtu është hapur
shkolla e qeramikës, po studiohet plani për realizimin e një parku arkeologjik dhe
për vijimin e gërmimeve në Umm Al-Rasàs, 40 kilometra në juglindje të Madabasë. Në
këtë vend françeskanët rigjetën Kishën e Shën Shtjefnit, me një dyshme madhështore,
realizuar me mozaik, ku skicohen hartat e disa qyteteve të Palestinës.
Qyteti
Madabà Qendër që banohet që prej 4500 vjetësh e që kujtohet në Bibël si qytet
moabit me emrin Medeba (Nm 21,30; Gs 13-9, 16). Në vitin 106 qyteti përfshihet
në provincën romake të Arabisë. Nis një zhvillim të vrullshëm. Ngrihen ndërtesa madhështore
publike e rrugë të gjëra. Gjatë shek. I, krishterimi përhapet me shpejtësi në të
gjithë Arabinë, por besimtarët persekutohen e shumë prej tyre humbasin edhe jetën
gjatë persekutimit të Dioklecianit. Pas kthimit të Kostandinit e posaçërisht në shekullin
V e më tej, Madabà ka një ipeshkëv e, në epokën bizantine (shek VI-VII), këtu ndërtohet
një numër i madh kishash. Ky vend është i famshëm për gjetjen e ‘Hartës së Madabasë’,
me rastin e rindërtimit të Kishës greko-ortodokse të Shën Gjergjit (1896). Është fjala
për mozaikun, në të cilin paraqitet harta e gjithë Tokës Shenjte, rruga që duhet përshkuar
për të arritur në Jeruzalem përmes pesë zonave të ndryshme, e edhe vetë Qyteti Shenjt,
me të gjitha hollësitë: me muret e rrethuese, Portën e Damaskut, Portën e Shtyllës,
Portën e Rrumbullt, Bazilikën e Varrit të Shenjtë e Bazilikën e “Sionit Shenjt’, me
të cilën lidhet Çenakulli. Madabà, qytet ku ka lindur Patriku i Jeruzalemit për
Latinët, Fortlumturia e Tij, Fuad Tual, sot zë vendin e pestë ndërmjete qyteteve të
mëdha të Jordanisë, si për numrin e popullsisë, ashtu edhe të shtegtarëve që e vizitojnë
çdo vit.
Xhamia kushtuar “Mbretit Hussein Bin Talal” Kjo Xhami madhështore
u ndërtua nga Mbreti Abdallah II për kujtim të babait të tij. U përurua më 12 prill
2006. Ndërtesa e kultit, ngrihet mbi një terren prej prej 60 mijë metrash katrore,
në kodrën më të lartë të parkut publik të Amanit. Vetë Xhamia shtrihet në një terren
me sipërfaqe 7. 700 metra katrore e mund të zërë rreth 6 mijë besimtarë. Arkitektura
është tipikisht islamike, me formë katrore, me një kupolë prej bakëri e me katër minare
katrore, 46 metra të larta, vendosur në të katër skajet, mbuluar me kupola bakëri.
Pranë Xhamisë janë shkolla kuranike, biblioteka, burimet e ujit ku besimtarët marrin
avdes si dhe Muzeu Hashemit, me koleksionin e tij historik unik mbi dinastinë sunduese
Hashemite. Duke vizituar Xhaminë, Benedikti XVI u shpreh kështu: “Vendet
e kultit, si Xhamia madhështore e Al-Hussein Bin Talal, kushtuar Mbretit të ndjerë,
lartohen si stoli mbi faqen e tokës. Nga koha e më e lashtë, tek ajo më moderne, nga
më e shkëlqyera, tek më e përvujta, të gjitha na çojnë drejt hyjnores, drejt Hyjit
të vetëm, të Gjithëpushtetshmit. E në rrjedhë shekujsh, këto shenjtërore kanë tërhequr
burra e gra brenda hapësirës së tyre të shenjtë për të pushuar një çast, për t’u lutur
e për të kujtuar praninë e të Gjithëpushtetshmit, si dhe për të pranuar se ne të gjithë
jemi krijesat e tij”.