ኣብ ኣማን ዘተ ካቶሊካውያንን እስላምን

ኣብ መንጎ ዝተፈላለያ ሃይማኖታት ዝግበር ዘተ ዝኃሊ ጳጳሳዊ ቤት ምኽርን ብዛዕባ ዝተፈላለያ ሃይማኖታት መጽናዕቲ ዘካይድ ተቛም ብሓባር ኣብ ኣማን ዘካየድዎ ናይ ካቶሊክን እስላምን ናይ ሓባር ዘተ ትማሊ ተዛዚሙ።

ናይ ካቶሊክ ሃይማኖት ልኡካን ዝመርሑ ኣብ መንጎ ዝተፈላለያ ሃይማኖታት ዝግበር ዘተ ዝኃሊ ጳጳሳዊ ቤት ምኽሪ ሊቀ መንበር ብፁዕ ካርዲናል ዣን ልዊ ቱራን ነቶም ናይ ምስልምና ሃይማኖት ልኡካን ዝመርሑ ናይ’ቲ ብዛዕባ ዝተፈላለያ ሃይማኖታት ዘጽንዕ ተቛም ኣመሓዳሪ ሓሳን ኣቡ ኒማሕ ከምዝኾኑ ተገሊጹ። እቲ ዘተ “ሃይማኖትን ማኅበረ ሰብን” ብዝብል ኣርእስቲ ዝተመርሔ ከምዝነበረ ክንገር እንከሎ፣ እቲ ዝተኻየደ ሃይማኖታዊ ዘተ፣ ብናይ ኃባር መገልጺ ከምእተዛዘመ ተገሊጹ። “ሃይማኖት ስግረ-ፖሊቲካዊ ደረትን ጥቕምን ናይ ሥልጣን ድላይን ኮይኑ ኣብ ማኅበረሰብ ንናይ ሓባር ጥቕሚ ዝኣመተ ኣበርክቶ ኣለዎ” ዝብል መርገጺ ኣብቲ ናይ ሓባር መገልጺ ተጠቒሱ ይርከብ።

“መንእሰያት ኣብ ናይ ምክብባር ሓድሕድን ኣብ ናይ ዘተ ባህሊ ክብርን ዝኾነ ይኹን ዓመጽ ክነጽጉ ዘኽእሎም ሕንጸት ክረኽቡን፣ በዚ መገዲ’ዚ ድማ ናይ ሓባር ሰላማዊ ናብራ ምንቕቓሕ ኣገዳሲ ምዃኑ” ኣብቲ ናይ ኃባር መግለጺ ተገሊጹ ኣሎ። ኣድላይነት ዲሞክራስን መሰልን ፍቓድን ውሑስ ዝኾነሉ ኣብ ሰብኣዊ ነጻነትን ናይ ሃይምኖት ነጻነትን ማዕርነት ዜጋታት ዝኣምንን ናይ ውኁዳን ሃይማኖታትን ዓሌታትን ዘኽብር መግሥቲ ብምትንታን፣ ሃይማኖታት ንናይ ሰላማዊ ማኅበራዊ ሱታፌን ውኅደትን ክህሉ፣ ኣብ ምትሕብባርን ምክብባርን ምድግጋፍን መሠረታዊ መምርሒ ዝኣምን ማኅበረሰብ ኣብ ምርግጋጽ ዓቢይ ግደ ከምዘለዎ ድማ እቲ ዝተኻየደ ጉባኤ ከምዘገንዘበ፣ ኣብቲ ናይ ሓባር መግለጺ ተጠቒሱ ኣሎ።

ናይ’ዚ ኣብ ሞንጎ ካቶሊክን እስላምን ዝተኻየደ ናይ ኃባር ዘተ ካልኣይን ናይ’ዚ ጉባኤ መቐጸልታን ድሕሪ ክልተ ዓመት ኣብ ሮማ ንኽካየድ ከምዝተወሰነ ተነጊሩ። ኣብ መደምደምታ እቲ ናይ ኣማን ጉባኤ ብፁዕ ካርዲናል ቱራንን ልዑል አል ሓሳን ቢን ጣላልን ንተጋባእያን ዝሃብዎ ኣበርክቶ ብምጥቃስ ምስጋና ከምዘቕረቡ ተገሊጹ።