(20.05.2009 RV)Sintezë e dhjetra
vitesh studimi e kërkimi, libri “Korridoret e Rafaelit. Lashtësia, Bibla, Studioja,
Fati” i Nikol Davod, përshkruan shkëlqimin e njërës prej kryeveprave të artit dekorativ
të Perëndimit: Korridoret e Rafaelit, të hapura për publikun vetëm dje, me rastin
e paraqitjes së librit. Kryevepra të artit dekorativ të Rilindjes, maja shprehëse
të gjenisë artistike të Rafael Sancios nga Urbini, Korridoret e lashta, brenda Pallatit
Apostolik në Vatikan, iu ofruan kështu mahnitjes së botës për të treguar me dritën
e tyre shenjtërinë e lidhjes ndërmjet njeriut e Zotit. Pikë referimi e padiskutueshme
për breza të tëra piktorësh, vepra monumentale – në analizën e bërë nga Nikol Davos
– pati sukses pikërisht, sepse rilexoi nga pikëpamja moderne stilin klasik, që karakterizon
dekorimet dhe pikturat e Domus Aurea të Neronit, esencialitetin e cikleve paleokristiane
e mesjetare dhe i bën ato pikënisjen e një tregimi të thjeshtë, të harmonishëm e të
ekuilibruar të Besëlidhjes së Vjetër e të Re. Quhet me të drejtë “Bibla e Rafaelit”
dhe përshkruan me penelata piktori harmoninë e trashendencën e Zotit. Është arti,
që përshkon shtigje të panumërta e bëhet interpretues i së shenjtes. Të dëgjojmë Antonio
Paoluçin, drejtor i Muzeve të Vatikanit: “Nga njëra anë bukuria e pikturës
së lashtë që zbulohej pikërisht në ato vite; nga ana tjetër bukuria, lavdia e asaj
që të kap syri, i natyrës: fruta, lule, zogj, dallëndyshe që fluturojnë në qiellin
e kaltër. Gjithçka e justifikuar dhe e shenjtëruar nga Lajmi i Mirë. Në fakt, lart,
në tavan, kemi të ashtuquajturën “Bibël të Rafaelit”, historia e Besëlidhjes së Vjetër”. Korridoret
e Rafaelit janë imituar anekënd botës: në Shën Pietërburg, në Kapitol Hill të Uashingtonit,
e aktualisht janë pasuri e njerëzimit, mbrojtur nga UNESKO.