Benedikti XVI: erdha si mik i izraelitëve dhe i palestinezëve: kurrë më luftë! Kurrë
më terrorizëm! Lutem për të ardhmen pa mure!
(15.05.2009 RV)Përfundoi sot udhëtimi
i 12-të apostolik i Papës Benedikti XVI, pas tetë ditësh të ngjeshura me aktivitete
e takime në Tokën Shenjte. Erdha në këtë vend si mik i izraelitëve dhe i palestinezëve,
tha Papa në ceremoninë e lamtumirës, në aeroportin e Tel Avivit, sot pak pas mesditës.
Të pranishëm presidenti izraelit Shimon Peres dhe kryeministri Benxhamin Netanijahu.
E si mik, Ati i Shenjtë bëri këtë thirrje të fuqishme: “No more bloodshed!
No more fighting...” Kurrë më gjakderdhje! Kurrë më ndeshje! Kurrë më
terrorizëm! Kurrë më luftë! Ta thyejmë rrethin vicioz të dhunës. Të vendoset paqja
e qëndrueshme, e bazuar mbi drejtësinë, qoftë pajtim e shërim i vërtetë”. Me
tone të ndezura, fjalimi i fundit i Benediktit XVI në këtë shtegtim pas gjurmëve të
Jezu Krishtit. Papa kërkoi që të njihet universalisht e drejta e Shtetit të Izraelit
për paqe e siguri, brenda kufijve të njohura nga bashkësia ndërkombëtare dhe e drejta
për një atdhe të pavarur palestinez, ku njerëzit të jetojnë me dinjitet e të mund
të lëvizin lirisht. Zgjidhja e konfliktit në Lindjen e Mesme, që duhet të çojë në
krijimin e dy shteteve, të mos mbetet ëndërr, por të bëhet realitet, theksoi Papa
Racinger. Duke përshkuar etapat e udhëtimit, Ati i Shenjtë nuk e fshehu se një
nga pamjet më të trishtuara, ishte muri i ndërtuar nga izraelitët për t’u mbrojtur
nga palestinezët: “As I passed alongside it, I prayed… “Ndërsa
ecja pranë tij, u luta për një të ardhme, në të cilën popujt e Tokës Shenjte të jetojnë
sëbashku në paqe e harmoni, pa nevojën e mjeteve të tilla të sigurisë e të ndarjes,
por duke e respektuar njëri-tjetrin, duke pasur besim tek tjetri, e duke hequr dorë
nga çdo formë dhune dhe agresioni”. E di se arritja e këtij objektivi do të
jetë e vështirë, tha Papa duke iu drejtuar presidentit izraelit Peres e duke e siguruar
atë dhe Autoritetin Palestinez për lutjet e veta e të katolikëve të mbarë botës. Benedikti
XVI kujtoi edhe vizitën në Memorialin e Holokaustit Jad Vashem, ku u takua me të mbijetuarit
e shfarosjes naziste: “Those deeply moving encouters brought back...” Ato
takime thellësisht mallëngjyese ripërtërinë kujtimet e vizitës sime të tri vjetëve
më parë në kampin e vdekjes së Aushvicit, ku kaq shumë hebrenj – nëna, baballarë,
burra, gra, vëllezër, motra, miq – u shfarosën çnjerëzisht në një regjim pa Zot, që
propagandonte ideologjinë e antisemitizmit dhe të urrejtjes. Ai kapitull i frikshëm
i historisë – tha Papa – nuk duhet harruar apo mohuar kurrë. Në të kundërtën, ato
kujtime të errëta duhet ta përforcojnë vendosmërinë tonë e të na afrojnë edhe më tepër
njërin me tjetrin, si degët e të njëjtit ulli, të ushqyer nga të njëjtat rrënjë e
të bashkuar nga dashuria vëllazërore”.