Pagëzimi i Jezusit
(10.05.2009 RV)Simbas Mateut, Markut e Lukës
Mt. 3,13-17
13 Jezusi shkoi prej Galilejet në Jordan, te Gjoni, për t’u pagëzue prej tij.
14 Gjoni, përkundra, donte me ia prishë tue i thanë: “Jam unë që kam nevojë me kenë pagëzue prej tejet, e ti vjen te unë?”.
15 Por Jezusi ia kthei e i tha: “Lêne atë punë për tash, përsè asht ma mirë që në ketë mënyrë të plotësojmë gjithçka asht shkrue”. Atëherë Gjoni pranoi.
16 Porsá u pagëzue, Jezusi duel prej ujit; e qe se u çilën qiellët për tê e Gjoni pau Shpirtin e Hyut kah po zdrypte porsi një pëllumb e kah po xênte vend mbi tê. 17 E qe se një za prej qiellet tha: “Ky asht Biri em i dashtuni, në të cilin e kam vû kënaqësinë teme”.
Mk.1,9-11
Pagëzimi e tundimi i Jezusit
9 Në ato dit Jezusi erdh prej Nazaretit të Galilesë e kje pagëzue në Jordan prej Gjonit. 10 E, tue dalë prej ujit, pau kah çileshin qiellët e kah po zdrypte Shpirti Shenjt mbi tê në trajtën e një pëllumbit. 11E u ndie një za prej qiellet: “Ti je Biri em i dashtun, në ty e kam vû kënaqësinë teme”.
12E menjëherë Shpirti e shtyni Jezusin të shkojë në shkretí 13 e këtu ndei katërdhetë dit, i tunduem prej shejtanit: ndei në shoqní me bishë, e engjujt i shërbejshin.
Lk. 2,21-22
Pagëzimi i Jezusit
21 E ndodhi që, mbasi kje pagëzue tanë populli, në sa Jezusi, tue pasë marrë edhe ai Pagëzimin, ishte në lutje, u çil qiella 22 e mbi tê zdrypi Shpirti Shenjt në trajtën trupore në ngjasim të një pëllumbi, e u ndie një za prej qiellet: “Ti je Biri em i dashtuni, në ty e kam gjetë kënaqësinë!”.
Prej‘Besëlidhjes së Re’ – përkthye nga Atë Daniel Gjeçaj ofm, Romë 1968.
| All the contents on this site are copyrighted ©. |