Vizita ad Limina Apostolorum e ipeshkvijve katolikë të Perusë

(05.5.2009 RV)Këtyre ditëve në Vatikan, po zhvillohet vizita ad Limina Apostolorum e ipeshkvijve të Perusë, e cila do të përfundojë më 23 majin e ardhshëm. Vendi i tretë i Amerikës Latine për madhësi territoriale, Perů ka 28 milion banorë prej të cilëve 88 % janë të fesë katolike. Kisha peruviane është e ndarë në 7 kryedioqeza e 19 dioqeza , 10 prelatura territoriale e 8 vikariate apostolike. Kryeipeshkvi i Trujillo imzot Héctor Miguel Cabrejos Vidarte, president i Konferencës Ipeshkvnore peruviane duke u ndalur mbi situatën e Kishës në Perů mes tjerash thotë: “Ekziston aspekti i impenjimit, i sfidave të ungjillëzimit dhe ai i misionit të Kishës në shoqërinë peruviane. Një ndër shqetësimet që kemi është ai i përhapjes së sekteve fetare në Amerikën Latine, për çka është përgjigjur Konferenca e Kishës së Amerikës Latine në Aparecida të Brazilit. Pastaj, kemi edhe sfidën që ka të bëjë me Doktrinën shoqërore të Kishës: në Perů, ekziston një numër tejet i lartë i varfërisë e mjerimit që shkon përtej krizës financiare botërore e krizës së Amerikës Latine. Është sfida që e interpelon Kishën, sepse ungjillëzimi nuk mund të anashkalojë promovimin integral të personit. Ungjillëzim do të thotë shpëtim e takim me Krishtin, por edhe formim integral të qenies njerëzore. Janë këto realitete që do t’ia paraqesim Papës, gjatë kësaj vizite ad Limina.